Shillong, Jylliew 23:
Ka Shillong Lajong FC (reserve team) ka la khur ïa ka jingjop kaba nyngkong ha ka lympung ïalehkai Invitation Open To All Football Tournament 2023, hadien ba ka lah ban pynliem noh ïa ka Oste Phi Oiñ-B F.C da 2-1 kol ha ka sngi Thohdieng ha madan Kurkalang kaba ha Bhoirymbong.
Ha kane ka jingïakhun la sakhi ba baroh ar kynhun ki la ïakhun tyngeh naduh kaba sdang. Pynban dei ka Lajong kaba la ïoh ban pynkhih jar nyngkong eh ha ka minit kaba 21 lyngba u Donbok. Hadien shiteng kynta kane ka kynhun ka la pynbud ïa ka kol ba ar lyngba u Batskhem ha ka minit kaba 36 na ka bynta ban tam 2-0 kol ha ka kylla step.
Hadien ba la bteng ïa ka jingïakhun jong ka kylla miet kine ki kynhun ki la bteng ban ïakhun tyngeh bad khamtam eh ka Oste Phi Oiñ-B kaba dang donkam ban pynphai. Dei ha ka minit kaba 61 ka la ïoh ban thep shi kol lyngba u M. Lyngkhoi.
Haduh kaba kut ka jingïalehkai ka Oste Phi Oiñ-B kam shym la lah shu ban pynphai bad ka la mad ïa ka jingshah rem ha ka Shillong Lajong.
Lyngba kane ka jingjop, ka Shillong Lajong kan pynkhreh ïa ka jingïakhun ba ar pyrshah ïa ka Ri Syon N.E.F.C, kaba la jop ïa ka Pahamrioh S.C da 3-1 kol ha ka 5 tarik u Naitung.
Ka jingïalehkai ha ka Sngi Saitjaiñ kan long hapdeng ka Ehrngiew FC pyrshah ïa ka Beneres FC ha ka por 2 baje noh phai sngi.
