Mawkyrwat, Jylliew 23:
Ka Rangthong Christian Higher Secondary School bad ka Upper Mawbidong ki la rah ïa ka nam lahduh ha ka lympung ïalehkai South West Khasi Hills District Level Inter School Subroto Mukherjee Cup Football Tournament 2023 ba la pynïaid da ka shlem treikam u District Sport Officer (DSO) SWKHD.
Kine ki kynhun kin mihkhmat ïa kane ka district sha ka State Level Subroto Cup ka ban sa long shen ha kane ka nongbah.
Ha ka jingïakhun final jong ka Under-17 boys ha ka sngi Thohdieng ha madan MDSA Stadium Mawkyrwat, ka Rangthong Christian HSS ka la pynliem noh ïa ka Kerlin Secondary School na Mawten lyngba ka tie-breaker da 2-0 kol.
Ka jingïakhun ha kane ka sngi ka la long shisha kaba itynnad bad pynhun ïa ki nongpeitkai baroh. Ka Rangthong ka la lah ban ïalehkai bha bad ñion tyngeh ïa ka liang pyrshah, hynrei da ka jingtbit ki rangïalehkai ’dien ka Kerlin kam shym la lah ban pynkhih ïa ka jar. tat haduh ban da kut ka por jong baroh ar tylli ki kylla. Dei ha ka tie- breaker ba ka Rangthong ka la lah ban kynjoh sha ka thong jong ka jingjop.
Ha ka ïalehkai jong ki khynnah shynrang Under-14, ka Upper Mawbidong Secondary School ka lah ban pynliem noh ïa ka Phlang Kynshi Upper Primary School da 3-0 kol na ka bynta ban khur ïa ka jingjop.
Katba ha ka jingïalehkai Under-17 pat jong ki khynnah kynthei, ka Rangthong Christian Higher Secondary School ka la lah ban pynliem noh ïa ka Sakwang Presbyterian Higher Secondary School da 1-0 kol.
Ha kane ka sngi la ïadon lang u Deputy Commissioner kane ka district u Bah T. Lyngwa, ha ryngkat ka jingdonlang ka Kong Y. R Mawlong, ADC, Bah D. Mawleiñ, Superintendent of Police SWKHD, Bah D. Syngkon, DSO ka SWKHD , Bah Y.G Lyngdoh Working, President ka MDSA bad kiwei kiwei.
