Nongstoiñ, Jylliew 23:
Ka jingpynlong ïa ka jingkhmih bniah ïa ki rta jong ki khynnah ïalehkai ki ban ïashim bynta ha ka District Level Subroto Mukherjee Football Cup ka ban long ha West Khasi Hills, ka la pynlong ïa ki dkhot ka Screening Committee ban shah byrngem ha ki katto katne ki nonghikai skul.
Ïa kane la pynpaw da ka District Sport Officer (DSO) Kong Balarina Syiem ha ki lad pathai khubor ha ka sngi Thohdieng ha ka shlem treikam lajong. Nangta, ka la pynpaw ïa ki dkhot hapoh kane ka Screening Committee la thung da kiba laitluid bad ki bym don jingïadei eiei bad kino kino ki skul ki ban ïashim bynta ha kane ka lympung kaba la thmu ban sdang naduh 26 tarik mynta u bnai.
Ïa katei ka jingkhmih rta la pynlong ha ka 21 tarik mynta u bnai ha kaba ka la mih ka jingkulmar na ka daw ka jingslem palat ban pyndep kat haduh ban da kem dum ka por.
Namar kata, na ka liang ka DSO ka la pynrem jur da kaba ong ba ki don kiba da byrngem hi ïa ki dkhot jong ka Screening Committee da ki kyntien kiba khor.
Kumta ka Kong Syiem ka la ong ba nangne shakhmat ka kyrmen ban ym don shuh kum kine namar haba shisien ba trei ïa kano kano ka kam la kumno kumno donkam ïa ka jingïatreilang namar tang na ka liang ka shlem treikam kam lah ban ong ba ka lah ban pynkiew ïa ki kam ïalehkai ha ka District, hynrei donkam ka jingïatreilang.
Ïa kane ka lympung la phiah ha ki lai tylli ki kyrdan ïalehkai, kita ka Under-14 jong ki khynnah shynrang bad ka Under-17 jong ki khynnah shynrang bad kynthei.
Ha kaba ïadei bad ka jingmih shibun ki jingkynthoh halor ka rukom pynïaid ïa ka jingkhmih rta na ka bynta ki khynnah skul, ka Kong Balarina ka la kubur ba ka la shimpor ban dep namar ka jingbun palat ki skul ki ban ïashim bynta ha kane ka lympung. “Ha kane ka jingkhmih ïa ki rta ki khynnah ka la slem ban pyndep namar ka jingbun palat ki khynnah ha kaba tang na kawei ka kynhun ki la don haduh 25 ngut ha ki kyrdan bapher bapher.”
“Ha katei ka sngi ka la don ruh ka jingkyrpad na ki skul ba dei ban pyndep beit ïa ka jingkhmih rta (screening) namar kim lah shuh ban wan biang ha kawei pat ka sngi namar kan ktah ïa ki khynnah bad kumjuh ïa ka jinglut jingsep. Kumta ngim banse ban pyndep ha katei hi ka sngi.”
Halor ka jingkynthoh leh shiliang khmat ban jied ïa ki khynnah da ka jingïadon bynta lang ka coach jong kawei na ki skul ha ka Screening Committee, ka DSO ka la kyntait war ïa kine ki jingkynthoh bad ka la ong ruh ba ka jingjied kam shym la don ka jingleh shiliang.”
Ha kaba ïadei pat bad ka jingpyrkhing ïa ka jingkhmih ïa ka rta, na ka liang ka DSO ka la ong ba namar ka jinglap ba ki ju don ki khynnah kiba wanrah da ki syrnod thok bad kumta la bthah ruh ïa ki khynnah bad ki skul ba kin wanrah lang ïa ki kot ki sla ki ban pynshisha ïa ka snem kha kum u Aaadhar bad kiwei. “Ban kham pyntikna kham bniah ka komiti ka la phah sha u doktor u ban bishar bad ai ïa ka rai ba khatduh.”
Ka la bynrap ruh da kaba ong na ka liang ka shlem treikam kam ym ailad ïa kino-kino ki skul kiba thmu ban wanrah da ki syrnod thok bad ruh ban pynrung da ki khynnah na kiwei pat ki skul tang ban ïoh ïalehkai.
