Guwahati, Jylliew:
Ki la jan don kumba 5 lak ngut ki briew kiba la shah ktah na ka daw jong ka jingshlei um ha ka jylla Assam.
Kumba la ïathuh ka tyllong khubor la ong ba ki la don kumba 4.96 lak ngut ki briew kiba la shah ktah jur ha ki 22 tylli ki distrik jong ka Assam naba ka jingshlei um ka la nangjur ha ka sngi Palei.
Uwei u briew u la ïap ha Tamulpur hadien ba u la ngam jyllop hapoh ka um kaba la shlei.
Katkum ka jingïathuh jong ka kaiphot ba la wanrah da ka Assam State Disaster Management Authority (ASDMA), la ong ba ka jingshlei um ha Bajali ka la jur bha ha kaba ki la jan don 2.60 lak ngut ki briew kiba la shah ktah ha ka distrik ha kaba la bud da 77702 ngut ha Nalbari, 65221 ngut ha Barpeta, 25613 ngut ha Lakhimpur, 24023 ngut ha Baksa, 19208 ngut ha Tamulpur, 13704 ngut ha Darrang, 6538 ngut ha Kokrajhar distrik.
Ka um ka la tap ïa kumba 14091.90 hectares ka jaka rep ha ki distrik kiba la shah ktah na ka jingshlei um.
Ki la don kumba 1366 tylli ki shnong kiba hap hapoh ki 58 tylli ki Revenue Circle ha Bajali, Baksa, Barpeta, Biswanath, Bongaigaon, Chirang, Darrang, Dhemaji, Dhubri, Dibrugarh, Golaghat, Hojai, Kamrup, Kokrajhar, Lakhimpur, Majuli Nagaon, Nalbari, Sonitpur, bad Tamulpur distrik ki la shah ktah ha ka jingshlei um.
