Shillong, Jylliew 25:
U Manager jong ka Arsenal u Mikel Arteta u la pdiang ba ka kynhun jong u, ka donkam ban pynkhlaiñ ha kane ka ïew ïadie ïathied rangïalehkai, lada ka kwah ban long ka lahduh ne Champion jong ka lympung Premier League ha ka aïom ban wan.
Ka Arsenal ka la shah pynliem noh ha ka Manchester City kaba la knieh ïa ka nam lahduh jong u snem 2022-23.
Kumba ka paw mynta, ka Arsenal ka la kthong ban ïoh soi noh ïa u rangïalehkai pdeng ka West Ham United u Declan Rice bad ruh ka nang jan ban soi ïa u rangïalehkai shakhmat jong ka Chelsea u Kai Havertz.
“Ka aïom ban wan ka jong ngi kan long shisha kaba eh bha ha ka khana-pateng (history) jong ka lympung Premier League,” la ong u Arteta.
“Balei? Ka la dei ha u snem ba la lah. Nga la don ha England mynta la 22 snem bad ngam pat ju ïohi ïa kum kane ka jingïakhun, kaba paka bad tbit bha, kaba biang lut nadong shadong, ki coach ruh kiba tbit suda,” u la ong.
“Kane ka dei ka kyrdan kaba hajrong bha bad ban jop ïa ka nam lahduh jong ka Premier League, phi dei ban long kiba tbit tam, bad dei namar kata ba donkam ban pynkhlaiñ ïa ka kynhun,” la ong u Arteta.
Ka Arsenal ha ka aïom kaba dang shu dep, ka la bat ïa ka kyrdan kaba nyngkong hadien bun bun bnai. Hynrei kane ka jingïakhun ka la hiar noh hadien ka jingshitom jong ki rangïalehkai ba kongsan ka club kum u William Saliba.
Wat la ka Arsenal ka la pyndep ha ka kyrdan kaba ar bad wan phai biang sha ka lympung Champions League, u Arteta u la ong ba ka long shisha ka aïom kaba sngewsih. “Haduh mynta, ka dang ktah bha hapoh ka mynsiem ka jong nga, ba ngi khlem jop ïa ka lympung Premier League wat hadien 10 bnai ba ngi la ïakhun pyrshah bad ka Manchester City,” u la ong.
