Washington, Jylliew:
Ka khubor na US ka iathuh ba u Daniel Rodriguez uba long uwei na ki nongwan shim bynta ha ka jingwan thombor ia ka Capitol Hills la rai da ka iingbishar ba un hap ban shong patok haduh 12 snem halor ki kam be-aiñ bad nalor kane u Daniel u la pynap ruh da ka suloi ia uwei u hehpulit ha ki bynta jong ka ryndang ha katei ka jingjia ha u 2021. U Daniel uba la 40 snem ula shah tian bishar ha kaba ka nongbishar Amy Berman Jackson ka la rai pynrem ia u ba ula pynap suloi ia uwei u heh pulit bad shoh ruh ia u ha katei ka jingjia kaba la jia ha ka 6 tarik u Kyllalyngkot 2021.Ha ka por ba la tian bishar ia u Daniel haba la kylli la u don eiei ne em ban kren halor kane ka jingkem ia u ula ong ba ula leh ia kaei kaba u sngewdei ha katei ka por. Ha u bnai Rymphang ka iingbishar ka la pynhap ia u Daniel ha ki 4 tylli ki kam sniew ba ula leh bad kine ki kam sniew ki la pynlong ruh ia u ba un hap ban shong patok haduh 12 snem. Ka jingleit shim bynta u Daniel ha ka jingjia ha Capitol Hills ka dei kum shi bynta ban ai jingkyrshan ia u Donald Trump. Hadien jong ka jingiaid paidbah kaba la wan shim bynta da phew hajar ki nongshong shnong ka la don ruh ka jingleit thombor ia ka Capitol Hills ha kaba ki pulit kiba ap pahara ia katei ka jaka ki la shah shoh bad shah thombor ha ki paidbhur. Nalor u Daniel la don ruh sa kumba 1,000 ngut ki briew kiba la shah kem lang halor ka jingdonkti jong ki ha ka jingwan thombor ia ka Capitol hills bad kumba 500 ngut ki la shah rai ha ka iingbishar ban shong patok.
Dang ha u bnai ba la leit u Stewart Rhodes uba long u nongialam jong ka Oath Keepers ula shah rai set patok haduh 18 snem halor ka jingleit thombor ia ka Capitol Hills bad ka jingpyndonkam jong u da ki Pepper Spray ban siat ia ki pulit. Kiwei kiwei kiba la shah kem ki kynthup ruh ia u Kelly Meggs u nongialam jong kawei ka kynhun bad ia u la rai da ka iingbishar ban shog patok haduh 12 snem.
