Ïoh lum ka kynhun NFR da palat T. 10.54 lak na ki nongpynkheiñ aiñ

Guwahati, Jylliew:

Ka Northeast Frontier Railways (NFR) ka la ïoh ban lum ïa ka pisa kaba haduh T. 10.54 lak ka pisa ba la daiñ kuna na ki nongpynkheiñ aiñ ha ka por ba la don ka jingleit khynra sha kiba bun ki jaka ha ki ar bnai ba la dep ha ki san tylli ki Divisions jong ka.

Ha kaba ïadei bad kane, ki la don kumba 4,661 ngut ki briew kiba la donkti ha ka ban leh ïa ki kam beaiñ ha ki jaka kiba la hap hapoh ka jingpyntreikam bad kiba la shah pynngat ha ki kyndon jong ka Railways Act, 1989.

Ïa kane ka jingpyntreikam la leh da ka kynhun NFR khnang ban pyllait ïa ki jaka sangeh rel na ki nongdie madan, ki nongdie jingdie, ki nongdih duma bad ki nongleit shabar pathar.

Katkum ka jingthoh ba la pynmih da ka kynhun NFR, la ong ba ha u bnai Ïaïong bad Jymmang, la ïoh lum ïa ka pisa kaba T. 3.20 lak kum ka kuna bad 1077 ngut ki briew ki la shah mudui ba ki la leh ïa ki kam beaiñ ha ki jaka sangeh bad haduh jong ki lynti rel.

Kumba la ïathuh bniah, la ong ba T. 1.74 lak la lum na ka jingdaiñ kuna na ki nongdih duma bad T. 5.59 lak na kiba leit pynjhieh pathar.

Nalor kane, 926 ngut ki nongdih duma bad 2,658 ngut ki nongleit pynjhieh pathar ki la shah mudui.