Shillong, Jylliew 25:
Ka Them Rangshken Sports Club, Madanrting Sports Club bad ka Mawlai Sports Club ki la khur ïa ka jingjop ha ka lympung SSA Under-14 Football League 2023, katba ka Mawreng Sports Club bad ka PFR Academy ki la ïakhaid noh mar 2 kol.
Haba phai sha ka jingïalehkai kaba la long ha madan Polo ha ka sngi Saitjaiñ kata ha ka por 11 baje mynstep, ka Mawreng SC ka la ïakhaid noh da mar 2 kol ha ka jingïakhun pyrshah ïa ka PFR Academy.
Ka jingïalehkai hapdeng kine ar tylli ki club ka long kaba ïakhaid bad itynnad bha. Dei ka Mawreng kaba la ïoh ban thep kol nyngkong lyngba u B Dkhar tang ha ka minit kaba 12 bad ban tam lypa da 1-0 kol haduh ba kut ka kylla step.
Haba bteng ïa ka kylla miet, tang ha ka minit kaba 50, ka PFR Academy lyngba u K Synrem ka la ïoh ban pynphai ïa kane ka shi kol bad ha ka minit ba 54, ka Mawreng ka la tam biang da 2-1 kol lyngba ka kol ba la khyrwit biang da u B Dkhar hynrei ha ka minit ba 60 ka PFR Academy sa shisien ka la ïoh ban pynïakhaid biang lyngba ka kol ba la thep da u R Nongkynrih.
Ha ka jingïalehkai kaba la long ha ka por 12.30 mynsngi, ka Them Rangshken ka la pynliem noh ïa ka Mawpat Sports Club da 3-1 kol. Ïa ki kol jong ka Them Rangshken la khyrwit da u B Marbaniang ha ka minit ba 27, u A Sun ha ka minit ba 59 bad u E Warjri ha ka minit ba 60. Katba ïa ka shi kol jong ka Mawpat la thep da u AS Ryntathiang ha ka minit ba 55.
Haba phai sha ka jingïalehkai kaba lai kaba la long ha ka por 2.30 mynsngi, ka Madanrting ka la pynliem noh ïa ka Sohryngkham Sports Club da 2-1 kol. Ka jingïalehkai hapdeng kine ki ar tylli ki club ruh ka la long kaba itynnad, bad dei ka Madanrting kaba la khyrwit kol nyngkong lyngba u M Mawrie ha ka minit ba 13 hynrei ha ka minit kaba 55 u GG Kharbuli u la ïoh pynphai na ka bynta ka Sohryngkham hynrei tang hadien 3 minit kata ha ka minit ba 58 u M Mawrie u la khyrwit ïa ka kol kaba ar.
Ha ka jingïalehkai kaba khatduh jong kane ka sngi kaba la long ha ka por 4.15 janmiet, ka Mawlai Sports Club ka la pynliem noh ïa ka Kick Start Academy da 2-1 kol. Ïa ki kol ka Mawlai la thep da u I Dohling ha ka minit ba 25 bad 56 bad ïa ka shi kol jong ka Kick Start Academy la thep da u I Syiemlieh ha ka minit ba 36.
