Shillong, Jylliew 25:
Ka Hockey India ha ka sngi U Blei ka la pynbna ïa ka kyrteng jong ki 39 ngut ki rangïalehkai Hockey ka Ri na ka bynta ka national camp ka ban long naduh ka 26 tarik Jylliew haduh ka 19 tarik Naitung ha Sports Authority of India (SAI) Centre ha Bengaluru.
Hadien ka jingkilan met ha kane ka camp, ka kynhun kan sa leit pat sha Terrassa ha Spain, ha kaba kan ïakhun pyrshah pat ïa ka England, Netherlands bad ïa ka Spain, ka jingïakhun kum shi bynta jong ka jingrakhe ïa ka jingdap 100 snem ne kaba la tip ruh kum ka 100th Anniversary Spanish Hockey Federation International Tournament naduh ka 25 tarik haduh 30 tarik Naitung mynta u snem.
Hadien kane ka jingïakhun hapdeng ki saw tylli ki ri, yn sa pynbud sa da ka lympung Asian Champions Trophy ha Chennai naduh ka 3 tarik Nailar, ha kaba ka India kan ïakhun pyrshah ïa ka Korea, Malaysia, Pakistan, Japan bad China na ka bynta ka nam lahduh.
Kane ka kynhun ban leit kilan met ka kynthup ïa u rangap kol u Krishan Bahadur Pathak, PR Sreejesh, Suraj Karkera, Pawan Malik bad u Prashant Kumar Chauhan, ki rangïalehkai dien u Harmanpreet Singh, Jarmanpreet Singh, Surender Kumar, Varun Kumar, Amit Rohidas, Gurinder Singh, Jugraj Singh, Mandeep Mor, Nilam Sanjeep Xess, Sanjay, Yashdeep Siwach, Dipsan Tirkey and Manjeet.
Ki rangïalehkai shapdeng kiba la shah khot ki kynthup ïa u Manpreet Singh, Hardik Singh, Vivek Sagar Prasad, Moirangthem Rabichandra Singh, Shamsher Singh, Nilakanta Sharma, Rajkumar Pal, Sumit, Akashdeep Singh, Gurjant Singh, Mohd. Raheel Mouseen bad Maninder Singh. Katba u S Karthi, Mandeep Singh, Lalit Kumar Upadhyay, Abhishek, Dilpreet Singh, Sukhjeet Singh, Simranjeet Singh, Shilanand Lakra bad Pawan Rajbhar ki dei ki kyrteng ki rangïalehkai shakhmat.
“Ngi la lah ban ïalehkai bha ha ka lympung FIH Men’s Hockey Pro League 2022/2023 kaba la long ha Belgium bad Netherlands, bad mynta ngi kyrmen ba ngin lah ban bteng ïa kane ka rukom ïalehkai, khamtam ha ki lympung kiba kham donkam ki ban sa long mynta u snem,” la ong u Chief Coach ka India u Craig Fulton.
“Kane ka camp ne jingkilan met kan long ruh ka lad na ka bynta jong ngi ban nang pynbha bad pyntbit ïa lade ha ki katto katne ki jaka bad ruh ban ïatreilang ryngkat kum kawei ka kynhun sa shisien. Da ka jingdon jong ka Hero Asian Champions Trophy Chennai 2023 ha u bnai Nailar bad bud sa ka Asian Games 2023 ha Hangzhou, China, kumta kane ka jingkilan met kan long kaba donkam bha na ka bynta ka jong ngi ban sdang ïa ka jingpynkhreh na ka bynta kine ki bnai ban wan bad ban pynpaw ïa ka rukom ïalehkai kaba ngi kwah ban ïalehkai,” la ong u Coach.
