Doha, Jylliew:
Ka Qatar ka la pynbna ia ka jingiateh bad ka China ha kaba iadei bad ka jingshalan ia ka lyer (Gas Supply) ha kaba u Chairman ka CNPC u Dai Houliang lyngba kawei ka jingthoh ba u la pynmih u la ong ba lyngba kane ka jingiateh ka jingiadei hapdeng ka China bad Qatar kan sa nang kham skhem shuh shuh. Da kane ka jing-iateh ban shalan ia ka lyer sha China ka Qatar ka la nang kham ioh lad shuh shuh ban pynroi ia ka jingshalan lyer. Kumba ka paw mynta ka Qatar ka long ruh kawei na ki ri Middle East kaba ka jingpyniaid iew bad ka jingshalan ia ka lyer ka la nang kiew katba dang iaid ki snem. Ka China National Petroleum Corporation (CNPC) ha ryngkat ka Qatar Energy ki la soi ia ka jingiateh ha kaba ka China kan thied haduh 4 million metric ton ka liquefied natural gas (LNG) ha ka shisnem na kane ka ri Arab.
Ha kajuh ka por u Saad al -Kaabi uba long u hehduh ka Qatar Energy ha ka jingai jingkren sha ki nongthoh khubor u la ong ba ka CNPC kan sa shim khia ruh ban peit ia ki par umphniang ba don ha ki bynta ba shatei jong ka Qatar bad iarap pyntreikam ruh ia ka Qatar’s North Field LNG project.
Ha shwa jong ka China ka Qatar ka la soi ruh ia ka jingiateh bad ka Bangladesh na ka bynta ban pynpoi ia ka Natural Gas bad ha kajuh ka por ka Qatar ka la dep iakren sngewthuh bad ka Bangladeshi state company Petrobangla ha u bnai ba la leit ban soi ia ka contract kaba long haduh $10 billion.
Katba dang iaid ki snem bun ki ri kiba don ha dewbah Asia ki la sdang ban phaikhmat ia ka Qatar ha kaba iadei bad ka jingpynpoi ia ka Natural Gas bad wat ki ri Europe ruh ki la sdang na thied Gas na ka Qatar kaba long ka jingiohnong bakhraw ia kane ka ri.
