Naypyidaw,Jylliew:
Naduh ba ka la mih ka thma pohiing ha Myanmar bad ka jingshah weng noh ka Aung San Suu Kyi kum ka nongialam jong kane ka ri la iathuh ba ka shongsuk shongsain ha Myanmar ka la duh la dam noh ha kaba mynta kane ka ri ka don hapdeng ka jingumsnam ba shyrkhei bha bad kane ka la sdang naduh u Rymphang 2021. Ka UN ka sngew ba donkam ban leh eiei noh kloi ha kaba iadei bad kaei kaba la jia ha Myanmar mynta khnang ba ki nongshong shnong kin shongsuk shongsain noh.
Naduh ba ki shipai ki la synshar donbor ia kane ka ri la iathuh ba ki la pynher krad ia kiba bun ki briew sha ki ri kiba marjan ha kaba bun ki nongshong shnong kim sngewnud shuh ban shong ban sah ha la ka jong ka ri na ka daw jong ki kam runar jong ki shipai kiba la thombor naphang bad kiba ym shim pyrkhat shuh iano iano. Ka kaiphod ka iathuh ba mynta ki nongshong shnong ka Myanmar kila kylla long ki poiwir jong ki ri ba marjan bad ka UN ka sngew ba katto ka por ka la biang ia ki shipai kiba leh donbor ka Myanmar ban pynkut noh ia kane ka jingleh jong ki khnang ba ki briew jong ka kin ioh ban wanphai iing biang. Naduh ba ki shipai ki la don ha ka bor ki la pynher krad ia ki Ronghya da kaba ong ba kim dei satia ki trai shnong jong kane ka ri.
Ka UN kaba la peitngor bha halor kaei kaba la jia ha Mynmar ka sngew ba ki katto katne ki ri kiba ju pynpoi ia ki lad jingiarap sha Myanmar kin hap ban pynsangeh noh syndon ia kane katba ka jingumsnam kam pat shim la kut. Bun ki ri ki la pyrshang ban ai jingmut ia ka Myanmar ba kan don noh ha ka suk ka sain hynrei i kumba kane ka ri bad ki nongsynshar kim kwah satia ia kane. Bun ki ri kiba don ha dewbah Asia ki la don hapdeng ka jingsngewpher jingmut tang na ka daw jong ka jingjia ha Myanmar ha kaba don kiba la ai jingkyrshan ia kane ka ri bad don pat kiba la pynrem ruh ia ka jingleh donbor ki shipai kiba la synshar ia ka. Hadien jong ka jingumsnam kaba la jia ha Myanmar la ong ba ia kane ka ri la khang ba kan shim bynta ha ki jingialang ba la pynlong da ka ASEAN. Ka kaiphod ba la pynmih da ka UN ka iathuh ba haduh 1 million ki nongshong shnong ka Myanmar kila sakma sha kylleng ki ri naduh ba ka la mih ka jingumsnem ha kane ka ri. Haduh mynta ka jinghiar thma hapdeng ki shipai bad ki lehnoh jong kane ka ri kam pat shim la kut satia bad ka long ruh kaba eh ban batai lano ba kaneka thma kan poi noh sha kaba kut.
