Raphael Warjri
Ha kane ka khep mynta haba la mih ki rukom pyrkhat kiba pher, la don kiei kiei kiba la jia ha ka imlang sahlang ba ym lah ban kyntait bad ba ym dei ban kdup khlem nongrim. Da ki phew snem mynta la don byllai ki longiing longsem ki ba la aijait sha u kpa bad don ruh ki ba aijait syndon sha u tnga shynrang, bad shuh shuh la mih syndon da ka seng ka ba shongshit ban aijait shynrang, wat lada ki kam ba ki kwah ban aijait kpa. Hapdeng kine kiei kiei baroh la nang mih sa ki ba kdew ia ki iktiar sorkar ba kim lah ban tu-klar ia ka kam iing ne ka kam shimet jongno jongno. Kine ki syrdoh ha ka imlang sahlang ki la nang suhsat haduh ba la jwat ban law ban loit bad kumta dei ban pynshongnia halor ka jinglong jingman jong ka imlang sahlang kumba long mynta. Ka jingshisha ka long ba ym bit ban pyrkhing than bad ym long hi ruh ban synjor than, bad la dei ban don ka lynti pdeng ka ba adkar bad khlem khun ranab shano shano. U sawar halor kata ka nia ka long ba da lei lei ym lah ban ym kam Khasi shuh ia kiba aijait kpa ne aijait shynrang ha ba ki dang shitrhem bad dang tip janai ia la ka nong-rim jinglong Khasi. Hynrei kaba ma ka long ba kata ka mynsiem kyrshan ia la ka jaitbynriew ka khun ranab sha ka niam bad ka nang pynpait pynpra pynban ha ka jaka ban tehsong. La shem ba kito ki nongialam jong ki seng bhalang ki ba pynksan ia la ka jaitbynriew halor ka nongrim jong ka niam da kaba sot ia ki nia ki jutang na la ka niam lajong khlem da pyrkhat ba ka lah ban ktah ia kiwei pat kiba ym bud lang sha kata ka niam. Kumta nyngkong nyngshab dei ban weng shwa ia ka pyrkhat niam, khnang ban kdup lang salonsar ia ki paidbynriew salonsar.
Kumba ka paw shynna ka long ba tang kiba kham kiew ha ka jingnang jingstad bad kiba long niam Khristan kiba kham shitrhem bad bunsien shongshit ban aijait shynrang, wat lada ki don ruh kiba dang long ha ka niam tynrai Khasi ruh kiba shu kwah tynneng ia ka pyrthei khlem sngewthuh la ka thymmei tang namar ba ki la kham kiew ha ka jingnang jingstad. Ki rangli juki kiba bun lada ki dei na kano kano ka niam bad kiba dang shu pdeng ha ka jingnang jingstad te ki dang bud la ka tynrai kheiñkur kheiñjait na ka kmie. Kiba bun ki paidbah kin sngewmong ia kane ka ba la kdew, hynrei ka dei pat ka jingshisha kaba lah ban pyntroiñ ia ka daw bah jong ka jaitbynriew shityllup. Kam long kaba dei ba ki paidbynriew Khasi kiba la kylla niam Khristan ba kin shu tyllep naphang ia ki kam jong ka jaitbynriew tang namar ba la bun paid, bad kam long kaba dei ruh ia kito ki paidbynriew Khasi kiba dang bat la ka niam tynrai ba kin syier mynsiem bad ehrang ha kino kino ki phang kiba dei ban kyntiew ia ka imlang sahlang jong ki paidbynriew Khasi salonsar. Katba kine ki rukom sngew kyrpang ha la ka kynhun ki dang kynrei ka ba duhnong ka long ba baroh arliang mamla kin shu pynksan khlem poi sha ka thong. Kumta na ka bynta ban long salonsar ka jinglong Khasi la dei ban rai tang kawei ka bynta ha ka imlang sahlang bad kata ka dei ban kynmaw dngong ban kiar na kaba kam shimet ia kaei kaei kaba ktah ia ka imlang sahlang. Ha kaba kut hi ka dei ka seispah kaba rai ia ka lawei jong ka imlang sahlang bad kata ka long ka ba mynsaw namar ba ka lah ban shah lynsher ha kiwei ki paidbynriew baheh paid bad bakhraw ka spah ka phew.
Haba khmih ia ka jinglong briew ha ka imlang sahlang barabor ka dei ka long-iing ba parum pareh ka ba khring ia ki thab ki dab ban synrop lang ha kiba bun ki liang. Bunsien ki luk ki lak ki ba kyrduh ha la iing la sem ki ju shah tyndep ha kito ki ba kham pahuh pahai, wat lada ki tipbriew ban ri kyndong ia la ka nongrim katkum ka akor longbriew manbriew. Kine kiei kiei ki lah ban iai long ka jingmlien kaba lymbiang ban kheiñ pohdor ia la ka jong tang namar ba kyrduh bad ban kheiñkor ia kiwei tang namar ba ki riewspah. Kumta lada duk ne riewspah ki paidbynriew ki dei ban long sngur ha la ka jingsngewthuh ia la ka imlang sahlang khnang ba kiei kiei baroh kin long kiba ryntih salonsar, namar ym lah ban long ba kawei ka jaitbynriew bad arjait ki riti kiba khongpong. Namarkata ka la dei ka pali ban nujor ba ka dei kaba biang ban pynneh ha la ka riti khieñjait na ka kmie ne dei ban kylla noh sha kaba aijait shynrang. Ym lah long ba baroh artylli ki dustur kin treikam lang ha kawei ka jaitbynriew, namar kan sa wanrah shibun ki kynrum kynram ha kaba ym lah shuh ban law sohkyrdot. Ym biang ba ki ba dang bat la ka riti kheiñjait na ka kmie ban kyntait ia kita kiba kwah aijait shynrang bad ha kajuh ka rukom ym biang ba kita kiba aijait shynrang kin kheiñ sahdien ia kiba bat la ka thymmei ban kheiñjait na ka kmie. Hynrei la kumno kumno ka biang ba kiba kheiñjait na ka kmie kin sah ha la ka snap tynrai Khasi ban ia kito ki ba kwah ban kylla noh na ki daw kiba khlem lah ban tehsong shitylli ia ka jaitbynriew. Lada sngewthuh katta te kan wanrah ka bha ka miat ha ka imlang sahlang, lym kumta ki sohkyrdot jong ka longkur longjait kin thaiñ suhsat haduh ban da syrtok syndon ki paidbynriew salonsar.
