Shillong, Jylliew 25:
Ka lahduh jong ka lympung Indian Super League (ISL) ka Mohun Bagan ka la pynkhlaiñ ïa ka bynta ba shakhmat da kaba soi bad wanrah ïa u rangïalehkai shakhmat ka Albania u Armando Sadiku.
Une u rangïalehkai ba la 32 snem, uba la paw ruh ha ki lad pathai khubor hadien ba u la ïoh thep ïa ka shi kol jong ka Albania, kaba la thaw history ruh ha kaba ka la jop ïa Romania ha ka lympung Euro 2016, u la soi kontrak na ka bynta ar snem, la pynbna ki bor pynïaid ka Mohun Bagan.
Da ka jingwanrah ïa u Sadiku, ka bynta ba shakhmat jong ka Mohun Bagan kan long shisha kaba khlaiñ shuh shuh ryngkat lang u Hugo Boumous bad Dimitri Petratos, kiba la don lypa. Kumba ka long mynta ka Club ka dang phai khmat ruh ban soi sa ïa u rangïalehkai na ka club Central Coast kaba don ha ka lympung A-League ha Australia u Jason Cummings.
“Ma ngi mynta ngi la don jingtip bun halor ka kam ïalehkai phutbol jong ka India ha Spain. Kumta haba ki la wan sha nga, nga la phai khmat sha ka lympung ISL bad ka club, bad ka la shim por ïa nga tang hynñiew sngi ban ai ka jingmynjur ka jong nga,” la ong u Sadiku.
“Ka Mohun Bagan ka dei ka club kaba la paw bha hapoh India bad kumta nga phai shakhmat ban ïalehkai na ka bad ban don bynta ruh ha ka jingjop ka jong ka,” u la ong.
U Sadiku uba la ïalehkai hapoh ka Spanish League, u la ïalehkai khatduh na ka bynta ka club kaba don ha ka La Liga 2 ka FC Cartagena bad mynta ka dor jong u ha ka ïew ïadie rangïalehkai ka long kumba T.5.6 klur, kaba long katkum ka dor ka ‘transfermarket’.
U Sadiku u la mih madan haduh 38 sien na ka bynta ka ri jong u, ka Albania bad ïoh ban khyrwit haduh 12 tylli ki kol.
