Shillong, Jylliew 25:
Ka Inter Miami ka la pynbna ba ka la dep ban soi ïa u kapten jong ka Barcelona u Sergio Busquets, ka ban pynïakynduh biang sa shisien bad u rangïalehkai barim u Lionel Messi, uba ki la ju ïalehkai lang ha Barcelona.
U Busquets, ba la 34 snem ka rta, hadien ba u la pynlut por haduh 18 snem bad ka Barcelona, u la dep ban pynbna ha u bnai Jymmang ba un mih noh na ka Barcelona hadien ba ka la rah ïa ka nam lahduh jong ka lympung La Lig.
Une u rangïalehkai shapdeng mynta sa shisien un ïoh biang ban mih madan bad u rangïalehkai shakhmat ka Argentina u Lionel Messi, uba la 35 snem ka rta, uba la pynthikna mynta u bnai ba un pynïasoh noh sha ka Inter Miami na ka club Paris St-Germain.
U Busquets bad Messi ki la pynlut por lang haduh 13 tylli ki aïom ïalehkai ha Barcelona kata naduh u snem 2008 haduh u 2021. Ki dei kiba la don bynta lang ha ka jingjop jong ka Club, kata ban rah lai tylli ki nam lahduh ka lympung Champions Leagues, phra tylli ki nam lahduh ka La Liga bad hynriew tylli ki nam lahduh ka Copas del Rey.
Shuh shuh la ong ba kumba la jia ïa u Messi, une u rangïalehkai barim ka Spain u Busquets ruh u la shah tyrwa na ki club na Saudi Arabia, hynrei u la phai khmat ban leit sha ka club Miami kaba la long trai da u David Beckham.
U Busquets u la mih madan bad ïalehkai haduh 722 ki jingïalehkai na ka bynta ka Barcelona, u ban long ruh u rangïalehkai ba lai ban mih madan bun na ka bynta ka club.
Ha ki 15 tylli ki snem bad ka Barcelona, u Basquests u la ïoh ban thep 18 tylli ki kol bad ruh ban ïarap pynbuh bol haduh 40 tylli na ka bynta kiwei pat ki rangïalehkai ba kin khyrwit kol.
U Busquets u la pynïasoh sha ka Barcelona ha u snem 2005 kum u rangïalehkai khynnah bad hadien u la ïoh rung sha ka Barcelona B side shwa ban ïoh mih madan pat na ka bynta ka kynhun ha u snem 2008 hapoh ka jingïalam jong u manager u Pep Guardiola.
