Shillong, Jylliew 26:
Ka lympung ïalehkai District Level Inter School Subroto Mukherjee Cup Football Tournament 2023 ba la pynïaid da ka shlem treikam u District Sports Officer (DSO) East Khasi Hills ka la sdang ha ka Lah Sngi U Blei ha kane ka nongbah.
Ïa kane ka lympung la plie pyrda da u DSO, Bah O. Mawthoh ha kaba la ïadon lang ki coach, ki bor pynïaid bad kiwei kiwei. Ha kane ka lympung ki la don haduh 39 tylli ki skul jong kane ka district, kiba kynthup ïa 17 tylli ki kynhun ïalehkai Under-14 ki khynnah shynrang, 18 tylli ki kynhun ïalehkai Under-17 jong ki shynrang, katba ha ka liang ki kynthei ki la don tang saw tylli. Ïa ka jingïakhun semi final jong kane ka lympung yn pynlong ha ka 30 tarik.
Ha ka jingïakhun jong ka kyrdan ïalehkai Under-17 ki shynrang kaba la long ha madan Third Ground Polo , ka Nongbsap Secondary School ka la pynliem noh ïa ka O. M. Roy Memorial H.S.S dad a 5-4 kol. Ïa kine la thep da u Charles Glorious Sawkmie (33’), Dalambha Nongkhlaw (35’), Fredy Ryntathiang (36’), Richborn Kharpuri (38’) bad u Donboklang Kharjana (40’). Katba na ka OM Roy la thep da u Mebanlamlynti Masharing (34’), Lambok June Mylliem Umlong (36’), Rones John Thongni (37’) bad u Bankyrshanlang Kshiar (39’).
Ka Shillong College Higher Education ka la pynliem ïa ka Ïewrynghep SS da 2-0 kol. Kane ka la wan urlong lyngba ki ar kol ba la thep da u Taluiai Mawkhiew (13’) bad u Evening Tariang (57’).
Ka Tyrsad HSS ka la pynliem noh ïa ka Area Lai Kyntoit SS lyngba ka shi kol ba la thep da u Hamebansan Jyrwa ha ka minit kaba 36.
Ka Umphyrnai Presbyterian SS ka la jop da 4-2 kol ïa ka Mount Gerizim SS. Ïa kine kol la thep da u Banlamkupar Rynjah (68’), Pynkoplang Khongsam (71’), Arjunson Kharkongor (72’) bad u Jonathan Kharkongor (73’). Katba na ka Mount Garizim ka la pynphai kylla ar kol lyngba u Banskhembok Warshong (67’) bad u Kynsai Kupar Kharumnuid (69’).
Haba phai sha ka kyrdan ïalehkai Under-14 kaba la long ha madan Heh Mini Stadium kaba ha Mawlai Phudmuri, ka St. Anthony’s H.S.S. (Shillong) ka la pynjem khnap ïa ka Persara U.P. S.S.A.S (Sohryngkham) haduh shiteng dorjon. U Carykindi Diam Dkhar (34’ & 55’) bad u Kerrimicki Khongmalai (37’ & 51’) ki la thep mar ar kol, katba ïa ki shi kol la thep da u Dathrangki Nongtraw (9’), Mangkynsai Dadjied Marboh (53’).
Ka Sacred Heart Boys’ H.S.S (Mawlai) ka la pynjem khnap ïa ka Peniel English School haduh 7-0 kol. U Ïaisanlang Dohling (23’, 43’ & 50’) bad u Donkhlursingh Teron (32’, 39’ & 42’) ki la khur ïa ka hat-trick, katba ïa ka shi kaba nyngkong la thep kham hashwa da u Rimarki Makroh (11’).
Ka Govt U.P School Mawryngkneng ka la shah rem da 2-0 kol ha ka Tlong Umiam SS. Ïa kine la thep da u Wealthyboy Kharkrang (16’) bad u Bankupar Jana (37’).
Ka Ïewrynghep SS ka la pynliem noh ïa ka Rynli U.P. S da 5-0 kol. U Jerry Kurkalang u la ïoh ban the par kol ha ka minit kaba 15’ & 25’, katba ïa ki shi kol la thep da u Bashemphang Kharkongor (37’), Arwisstar Kharmawphlang (50’) bad u Hamwel Rynjah (52’).
Ka O.M. Roy Memorial H.S.S ka la pynjem khnap ïa ka Shillong Jailroad Boys H.S.S haduh 10-0 kol. U Lamshai Jana u la thep marwei haduh saw kol ha ka minit kaba 4’,7’,13’ & 34’. Ïa ki ar kol la thep da u Aibankhraw Kurbah (15’ & 30’) bad u Lekystar Wanñiang (19’ & 36’), katba ïa ki shi kol la thep da u Chesterfield Umsong (40’) bad u Wanbhabok Khongwir (47’).
Kane ka lympung kan bteng biang ha ka sngi Ba-ar ha baroh ar tylli ki madan ïalehkai. Ïa ki jingïakhun final yn pynlong ha ka 1 tarik u Naitung.
