Nongstoiñ, Jylliew 26:
Ka seng Hynñiewtrep Youths’ Council (HYC), West Khasi Hills ha ka Lah Sngi U Blei ka la aiti da ka jingthoh ha u Myntri ka tnat ïalehkai ka Sorkar Jylla, u Bah Shakliar Warjri na ka bynta ban pynïoh noh da ka madan ka ban siang da u phlang plastik (artificial turf) ha Nongstoiñ kumba kiwei ki district ki la dep ban ïoh.
U Bah Lumlang Kharsyiemlieh, President ka HYC, West Khasi Hills u la ong ba ka West Khasi Hills ka dei ka district kaba la rim ha ka Jylla napdeng kiwei pat. Kane ka District ka la kynjoh 46 snem tam, hynrei kam pat don ïa ka madan kaba biang lane ka madan artificial turf kumba kiwei ki ïoh.
“Kumta ha ka jingïakynduh bad u Myntri ka tnat ïalehkai ha ka Lah Sngi U Blei ka la ïoh ban aiti da ka jingthoh ba un leh eiei na ka bynta katei ka madan ïa kaba ki samla jong ka district ki angnud la kham slem” la ong u samla Lumlang
Shuh shuh la ïathuh ba na ka liang u Myntri ka tnat ïalehkai u la kular ban shim khia halor katei ka kam. Na ka liang u samla Lumlang ruh u la pynpaw ba kum ka kynhun kan ïai buddien ïa katei ka bynta khnang ba ki samla ïalehkai ka thaiñ kin ïoh lem kumba ïoh kiwei ki district ïa ki madan ïalehkai kaba biang.
