
Shillong, Jylliew 26:
Ka Wankhede Stadium ha Mumbai bad ka Eden Gardens ha Kolkata kin long ar tylli ki madan ïalehkai ban ïoh pynlong ïa ki jingïakhun semi final na ka bynta ka World Cup 2023.
Kane ka mut ba ka MA Chidambaram Stadium ha Chennai kan long kawei pat jaka na ka bynta kane ka lympung kaba heh.
“Ka Wankhede ha Mumbai bad ka Eden Gardens ha Kolkata ki long ki ar tylli ki jaka ban ïoh pynlong ïa ki jingïakhun semi final na ka bynta ka World Cup. Kham hashwa ka Chennai ka la don ha ka jingïaknieh ban ïoh pynlong ïa katei ka lympung, hynrei ka Eden ka la shah jied,” la pynpaw ki heh ka BCCI ha ka Lah Sngi U Blei.
“Kawei na ki daw ka long ha ka jinglong jingman ka suiñ bneng ha u Naiwieng kaba lah ban ktah bha ha Chennai ha kaba ka lah ban shah pynthut ha u slap.”
Ki khatar tylli ki synjuk ki ban ïoh pynlong ïa kane ka lympung ki la ïalum lang ha ka Lah Sngi U Blei ha Mumbai na ka bynta ban ïamir jingmut lang bad ban pyntikna ïa ki jaka ban pynlong ha shwa ban pynbna ha ka sngi kaba bud.
Lada ka India ka ïoh rung sha ka semi final, kan ïoh ban ïalehkai ha Mumbai.
Ka Wankhede Stadium ka dei kaba la ïoh pynlong teng ïa ka final ha ka World Cup 2011, ha kaba ka India hapoh ka jinglamkhmat u Mahendra Singh Dhoni ka la lah ban pynliem ïa ka Sri Lanka na ka bynta ban pynkut syndon ïa ki jingangnud kiba 28 tylli ki snem. Katba ka Eden Gardens ka dei ka jaka kaba la pynlong ïa ka jingïakhun hapdeng ka Australia bad ka England ha u 1987, bad ka Australia ka la khur ïa ka jingjop.
Mynta u snem kin don shiphew tylli ki kynhun ki ban ïashim bynta ha ka World Cup. Nalor ka India, kiwei pat ki ri ki long ka Afghanistan, Australia, England, Bangladesh, New Zealand, Pakistan bad ka South Africa ki dei kiba la ïoh rung sha ka ICC Cricket World Cup Super League 2020-2023.
Ar tylli ki kynhun kin ïoh rung sha ka World Cup lyngba ka lympung ïaknieh (World Cup Qualifiers), kaba dang ïaid mynta ha Zimbabwe.
Nalor ki ar tylli ki ri kiba la bat teng ïa ka nam lahduh (Sri Lanka bad ka West Indies), ha kane ka lympung ïaknieh kin kynthup lang ruh ïa ka Ireland, Nepal, Netherlands, Oman, Scotland, UAE, USA bad ka Zimbabwe.
Ha ka World Cup ka ban long hapoh ri India, ki 10 tylli ki kynhun kin ïakhun pyrshah shisien ha ka round-robin league kaba don haduh 45 sien ïakhun. Hadien kane yn pynbud sa ka semi-final bad ka final.