Kyiv, Jylliew:
U President ka Ukraine, u Volodymyr Zelensky bad u President ka United States- u Joe Biden, ha ka Sngi U Blei ki la iakren halor ka jingmih jong kawei pat ka kynhun shipai ‘Mercenary Troops’ hapoh Russia bad kaba la pynkhih win ia ka Russia ha kane ka kynti.
Ha katei ka sngi, kine ki nongialam ki la ioh ban iakren halor ki katto katne ki jingeh ba ka Ukraine ka hap ban iaid lyngba bad kumjuh ruh ki jingeh kiba ka Russia ka iakynduh ha kane ka por.
Kumjuh ruh na ka liang jong ka White House na United States, ka la pynbna halor ka jingiakynduh jong kitei ki arngut ki nongialam ha katei ka sngi.
Kumta, u Zelensky u la ong ba ka pyrthei baroh kawei ka dei ban pynshitom bad ai jingsneng ia ka Russia tad haduh ba ka jinglong- jingmah ha ka pyrthei kan iaid beit- iaid ryntih kumba ka dei ban long baroh shi katta.
Ka jingmih jong ka kynhun shipai ai nong ha Russia, ka long lyngba ka jing lam khmat jong u heh ka Wagner- u Yevgeny Prigozhin, uba la smai ban pyn-um bad pyn pulom ia ka tnat shipai jong ka Russia naduh ka taiew ba la leit.
Ha katei ka taiew, u Prigozhin u la bthah ia ka kynhun jong u ban leit knieh ia ki shlem treikam ki shipai ha ki bynta jong ka thaiñ South bad ban leit rung ruh sha ka nongbah Moscow ban knieh ia ka bor baroh.
Katei ka jingïakynad hapoh Russia hapdeng katei ka kynhun bad ki shipai ka Russia, ka la pynkyndit bad pynkylla khongpong ruh ia ki jingthmu ka Russia ha kane ka kynti.
Ha kajuh ka por, u Zelensky u la iathuh ba ka jingiakynduh jong u bad u Biden, ka long ban iakren ruh halor ka jing pynpoi ia ki ‘namding kiba khlaiñ bor bad kiba lah ban kot jngai bha.
Kitei ki nongialam ki lah ban iakynduh biang ruh ha ka jingialang jong ki heh ka NATO ka ban long hapoh Vilnius ha u bnai u ban wan.
U Zelensky u la ioh ruh ban iakren ia ki jingeh jong ka Ukraine lyngba ka jingiakren phone bad u Myntri Rangbahduh ka Canada- u Justin Trudeau.
Ha kawei pat ka bynta, u Zelensky u la ioh ban iakren ruh bad ka Poland haba iadei bad ka jinglong- jingman jong ki shipai ka Ukraine hapoh madan thma bad kumjuh ruh ka jing bym shngaiñ jong ka shlem pynmih Nuclear kaba don ha Zaporizhzhia, sha ka phang South jong ka Ukraine bad kaba la hap hapoh ka kti ki shipai ka Russia.
