Beijing, Jylliew:
Ka China ha ka Sngi U Blei ka la pynpaw ia ka jingkyrshan ba ratbah jongka ia ka Russia haba iadei bad baroh ki kam bad ki rai jongka naduh ka jingleit hiar thma pyrshah ia ka Ukraine bad kumjuh ruh ha baroh ki liang kat kiba ka Russia ka shim rai. Kane ka khubor na ka China ka long hadien ka jingïakynad hapdeng ki shipai ka Russia bad ka kynhun Wagner Mercenary hapoh ka jingialam jong u Yevgeny Prigozhin.
Ka tnat kam bar ri jong ka China ka la pyntip da kaba ong ba ‘kum ki para marjan ri bad kum ki paralok hi, ka China kam don eiei ban pyrshah ia ki jingleh ka Russia bad namarkata ruh ka China kan nang ai ka jingkyrshan ia ka Russia khnang ba kan lah ban pynkhlaiñ ialade bad ban poi sha ka thong kumba ka la thmu’. Namar ka la ong ruh ba katei ka long ka kam iing- kam sem jong ka Russia bad kam donkam ban tuklar da kiwei pat ki bor ba nabar.
Ka China kam pat kren eiei halor kaei kaba la jia ha Russia ha kine ki sngi, dei tad haduh katei ka Sngi U Blei ba ka la kren shaphang ka jingmih jong kitei ki kynhun shipai kiba ialeh pyrshah kylla ia ka Russia.
Ha ka Sngi U Blei, u Myntri ka tnat kam bar ri jong ka China- u Qin Gang, u la ioh ban iakynduh bad u Myntri kam bar ri jong ka Russia- u Andrey Rudenko hapoh ka nongbah Beijing bad ha katei ka sngi, kitei ki heh ki la iakren halor ka jinglong- jingman hapdeng ka jingiadei ka China bad Russia.
Kumta, ha katei ka jing iakynduh jong kitei ki heh, la ong ba ka China ka ai jingkyrshan ia kat ki rai bad ki kam jong ka Russia tad haduh kane ka kynti bad kumjuh ruh ban nang pynkhlaiñ bad pynskhem ia ka jingiadei hapdeng kitei ki arliang ri nangne sha khmat.
Ka China bad Russia ki la iatrei lang naduh ki khyndiat snem ba la leit bad ka jingiadei hapdeng jongki, ka la sdang khlaiñ bad kham jan ruh naduh ba ka Russia ka leit ban hiar thma ia ka Ukraine.
Kumjuh ruh haba iadei pat bad ka thma ha Ukraine, ka China ka la pynpaw ia ka jingbym iashah liang shano shano ruh hynrei ka la ong ba ka ai jingkyrshan ia ka Russia ha baroh ki liang bad kumta kam treh ban pynrem ne ban pynduh jingkyrshan ia ka Russia ha katei ka jingleit hiar thma jongka.
