Aizawl, Jylliew:
Ki pulit ki la ïoh ban kurup ïa kiba bun tylli ki song jong u jingdih pynbuaid uba la kot sha ka T. 17 klur ha Mamit distrik jong ka Mizoram, la ïathuh ki heh pulit.
Ïa ki arngut kiba la shah kynnoh la tip kyrteng kum u Md. Idrish Miah (36) bad u Khugon Das (28). Kumba la ïathuh ki pulit jong ka Mizoram la ong, “Hadien ba la ïoh jingtip halor kane, ki pulit jong ka Mamit kiba la treikam halad jong kawei ka surok bah ha ka miet jong ka 23 tarik, Jylliew ki la ïoh ban bat ïa ka kali ba la ñiah da u Md. Idrish Miah jong ka Tripura.”
Ha ka por ba la pynlong ïa ka jingkhmih bniah, ka kynhun jong ki pulit ka la lap bad ïoh ban kurup ïa 270 tylli ki synduk sabon kiba don 3.47 kilo u Heroin, uba la kot sha ka T. 17 klur ha ka ïew bar ri, ha kaba ïa kine la thep ha ka bynta kaba hapoh jong ka kali.
Ka la don ka jingbuh jingmudui ha kaba ïadei bad kane ka jingjia hapoh ki kyndon 1(c), 25, 29 ND, bad PS Act. Ka jingtohkit ha kaba ïadei bad kane ka jingjia ka dang ïai bteng.
