Shillong, Jylliew 26:
Ka India kan pynkhreh ïa ka jingïalehkai kaba khatduh jong ka SAFF Championship 2023 pyrshah ïa ka Kuwait ha ka sngi Ba-ar bad kane kan long ruh ban ïaknieh lamkhmat ha ka Group-A.
Wat la ki la kamai mar 6 dor-thong (point) na ki ar sien ïakhun, hynrei ka Kuwait ka dang lamkhmat na kane ka group lyngba ka jingïapher kol ïa ka India kaba dei ka kynhun kaba la bat teng ïa ka nam lahduh.
Ka India bad ka Kuwait ki la ïakynduh teng haduh lai sien, hynrei ka Kuwait ka la khur jingjop ar sien, katba ka India ka la jop tang shisien.
Wat la ki la ïoh rung sha ka semi final, hynrei ka Kuwait ka la long ka kynhun kaba paw ha ka SAFF Championship. Ka rukom ïalehkai ka la long kaba mar ïaryngkat bor bad ka India.
Ka jinglah ban ïalehkai ki ’rangïalehkai ka Kuwait ha ka bynta kaba shakhmat kan buh jingeh ïa ka India ha kane ka jingïalehkai kaba khatduh.
Lyngba kane ka jingkhlaiñ bor ka Kuwait kan pynlong ïa ka India ba kam dei ka kheiñ sting ha kane ka jingïalehkai kaba khatduh hashwa ban kin rung sha ka semi final.
Kumba ka paw kane ka kynhun ïalehkai ka ri ka don ïa ki ’rangïalehkai kiba don ïa ka sap kyrpang ha kaba ki la lah ban pynpaw ïa ka jingtbit ha kum kine ki lympung kiba heh. Kumta ki lah ban ïalehkai bha na ka bynta ban wanphai biang sha ka jingjop ha kane ka lympung.
