Sydney, Jylliew:
U Myntri Rangbahduh ka Australia, u Anthony Albanese, ha ka Lah Sngi U Blei u la pynbna ia ka song jingiarap ba A$110 Million ($73.5 Million) ban phah sha Ukraine kynthup ia 70 tylli ki kali iakhun thma khnang ba ki shipai ka Ukraine kin ioh ban pynkhlaiñ ialade hapdeng ka jingiakhun pyrshah ia ki shipai ka Russia.
Katei ka song jingiarap kan kynthup ruh ia 28 tylli ki kali thma M113, 14 tylli ki kali ba kyrpang, 28 tylli ki trok bad 14 tylli ki ‘trailer’.
U Albanese ha katei ka sngi, u la ong ba ka Australia ka pynrem jur halor katei ka kam dusmon bad jingleh don bor jong ka Russia ia ki ri kiba rit ba ria bad kumta ka Australia ka ai ruh ka jingkyrshan ba ratbah ia ka Ukraine da kaba phah ia ki jingïarap kat kiba ka kot bor na ka liang jongka katba ka thma ka dang iaid sha khmat.
Kumjuh ruh la ong ba ka Australia kan nang pyniaid shakhmat ia ka jingpyllait ei ka bai pynpoi mar na Ukraine sha Australia, kum shi bynta ban pynim ia ka khaïi- pateng hapdeng ka Ukraine bad kane ka ri kumba ju long ha ki por ba la leit.
Da katei ka song jingiarap ha kane ka kynti, baroh ki jingiarap kiba ka Australia ka la noh synñiang sha Ukraine naduh ba sdang ka thma tad haduh kane ka kynti, ka la kot ia ka A$790 Million, kynthup ia A$610 Million ka song jingiarap sha ka tnat shipai Ukraine.
U Albanese u la iathuh ruh ba ia katei ka song jingiarap ba thymmai, la sdang ban pynkhreh naduh mar ia ioh jingtip halor ka jingioh knieh ka kynhun shipai ai nong ia ka nongbah Rostov ha ka Sngi Saitjaiñ.
