Shillong, Jylliew 26:
U Ilkay Gundogan u la soi ïa ka kontrak na ka bynta ka Barcelona hadien ba ka kontrak ka jong u ka la poi sha kaba kut bad ka Manchester City, la pynbna kane ka klob na Spain ha ka Lah Sngi U Blei.
Utei u ’rangïalehkai shapdeng (32 snem) na Germany, u la mynjur ïa ka kontrak kaba ar snem kaba lah ruh ban pynjlan kat kum ki kyndon ha ka jingsiew kaba 400 million euros ($436 million).
“Ka jingwanrah ïa u kan long ka jingïarap ban pynkhlaiñ ïa ka kynhun ha ka ban ïarap ban pynbuh bol ha ka bynta kaba shapdeng,” la pynpaw kat kum ka kyrwoh na ka Barcelona.
Kumba ka paw u Gundogan u long u rangïalehkai ba paw jong ka kynhun (Man City) u Pep Guardiola naduh ba u la ïasoh ha u 2016 ha kaba une u kapten jong ka kynhun u la lah ban ïalehkai bha ha kane aïom.
Une u ’rangïalehkai shapdeng u la ïoh ban thep ar sien ha ka final jong ka FA Cup na ka bynta ban khur jingjop ïa ka Manchester United. Na ka liang u Guardiola u la kubur ba ka City ka dang pyrshang ban pynthymmai biang ïa ka kontrak ka jong u.
Hynrei ka Manchester City ka la pynkhreh ban pdiang ïa ka jingwan poi u Mateo Kovacic na ka Chelsea khnang ban bujli ha ka jaka u Gundogan, uba la ïadon bynta ban khur jingjop haduh san sien ha ka Premier League ha ka por ba u dang don bad kane ka klob bad ruh ban khur ïa ka nam lahduh kaba nyngkong eh ha ka Champions League mynta aïom.
“Kane ka klob ka la lah ban pynurlong ïa ki jingangnud ki jong nga bad ka burom kan long sha ka klob kaba la plie lad ïa nga,” la pynpaw u Gundogan hapoh ka website jong ka Manchester City. “Ngan rah ïa ka nam jong ka City ha ka mynsiem ka jong nga.”
U Gundogan u la long uba nyngkong eh ba u Guardiola un wanrah sha ka City ha ka jingsiew kumba 20 million pounds ($25 million).
U la pynïasoh sha ka City na ka Borussia Dortmund. U la ïadon bynta ruh ban khur jingjop ha ka Bundesliga bad ka German Cup ha u 2012.
U Gundogan u la ïoh ban thep 60 kol ha ki 304 sien ïakhun na ka bynta katei ka klob, ha kaba u la ïadon bynta ruh ban khur jingjop 12 sien ha ki lympung ïalehkai kiba heh.
“U Ilkay u la long u rangïalehkai ba kynsai,” la pynpaw u shongknor ka City u Khaldoon Al Mubarak.
“Ban long u kapten ïa kane ka klob ka long kaba kyrpang bha, ha ka ban khur ïa ka jingjop nyngkong ha ka Premier League bad hadien ha ka FA Cup bad hadien biang ha ka Champions League. Kane kan ïai sah shirta ka nam jong ka Manchester City.”
