Imphal, Jylliew:
Ka sorkar Manipur ka la pynbna ba ka la nang pynjlan shuh shuh ha kaba ïadei bad ka jingkhang ban pyntreikam ïa ka Internet ha ka jylla sa kumba san sngi, kum shi bynta ban khanglad na kino kino ki jingjia basngewsih bad halor ka jingthmu ban wanrah ka shongsuk-shongsaiñ.
Kane ka rai ka la long hadien ba la mih ki jngïakynad bad ki jingïapynibor kiba la pynkhihwin ïa ka jylla. Katkum ka jingpyllait khubor, la ong ba ka jingpynsangeh treikam ïa ka Internet kan sah kumba la pynbna kata haduh ka por 3 baje janmiet jong ka 30 tarik, Jylliew kum shi bynta ban wanrah ka jingsuk ha Manipur.
Ka khubor ba la pyllait da ka sorkar ka la ong ba ki dang don ki jingïakajia kiba la mih hangne hangtai ha kaba kane ka la long ka daw ban nang pynjlan shuh shuh ïa ka jingkhang pyntreikam ïa ka Internet ha ki Mobile.
U Director General of Police, Manipur, u la ïathuh ba ki jingïakynad ha ka jylla ki la long da ki jingïapynibor markylliang, ki jinghiar thma bad nalor kine la don ruh ka jingïasiat kaba markylliang.
Ka tyllong khubor shuh shuh ka la ïathuh ba ki bor ba dei khmih ki la sngewkhia halor ka jingpyndonkam bakla jong ki riewshim kabu ïa ki lad phah khubor ha kaba nange ki la mih ki jingpynsaphriang ïa ki dur thok, ki kyntien kiba kren pyrshah ïa kiwei pat bad ki Video kiba wanrah bad nang pynjur ïa ka jingïakynad. Kane ka dei ka sien kaba lai ha kaba la nang pynjlan shuh shuh ïa ka jingkhang ban pyntreikam ïa ka Internet ha ka jylla.
