Guwahati, Jylliew:
Ki briew hapoh ka lama jong ka National Boro Christian Council (NBCC), kaba dei ka kynhun kaba heh jong ka Boro Churches of Assam, ki la ïalumlang ha Hall jong ka ïingmane kaba dei jong ka NELC, Bongaigaon Mission ha ka sngi Saitjaiñ na ka bynta ban pynlong ka jingduwai sngewlem na ka bynta ka jylla Manipur.
Ki prokram jingduwai ki long halor ka mat ba ïadei bad ka jingleit phai ka jingsuk na ka bynta ka Manipur kumba la ïohi ha ki ar tylli ki Placard.
U Lawrence Islary, uba dei u MLA na Kokrajhar East, u la ïashim bynta lang ha kane ka prokram.
Ha ka jingai jingkren jong u, u MLA Lawrence Islary u la buh ka jingkyrpad ïa ki nongïalam jong ka NBCC ba kin ïalumlang ha ka ban duwai na ka bynta ka Manipur, ha kaba mynta ka la ïohmad ïa ki jingeh kiba khraw.
U la pynpaw ïa ki jingtrei shitom jong u Myntri Rangbah jong ka Assam bad u CEM jong ka BTC ha ryngkat ka sorkar Manipur bad ka sorkar kmie na ka bynta ban wanrah jingsuk biang ha ka jylla Manipur.
