Shillong, Jylliew 26:
Ïa ka ilekshon jong ka Wrestling Federation of India (WFI) la nang hap ban pynjlan por shuh hadien ba ka Gauhati High Court ha ka Sngi U Blei ka la pynsangeh ïa ka ilekshon kaba la thmu ban pynlong ha ka 11 tarik u Naitung na ka daw ba ka jingujor da ka Assam Wrestling Association.
Ka Assam Wrestling Association, kaba la ujor pyrshah ïa ka WFI, IOA (ad-hoc panel) bad ruh ïa ka tnat ïalehkai jong ka Sorkar Pdeng, ka la ong ba ka dei hok ban ïoh long dkhot ha ka WFI, hynrei ym shym la ïoh jingmynjur ban ïoh ka jingithuh.
Ka state unit ka la kam ba ka Executive Committee jong ka WFI ka la mynjur ban ïoh ka jingithuh ha ka General Council jong ka synjuk kaba la long ha Gonda ha ka 15 tarik u Naiwieng 2014, hynrei ka la shah kyntait.
Na ka liang ka ‘ad-hoc panel’ jong ka IOA ka la pynbeit ha ka 25 tarik u Jylliew kum ka tarik kaba khatduh na ka bynta ban ïohpdiang ïa ki kyrteng ki ban ïoh ïashim bynta ha ka ilekshon kaba la thmu ban pynlong ha ka 11 tarik u Naitung.
Katei ka nongujor ka la ong ba ïa katei ka ilekshon lah ban pynlong tat haduh ba ka synjuk kan ïoh ïa ka jingithuh na ka WFI, bad ba ka lah ban thung ïa ki nongmihkmat sha katei ka ilekshon.
Kumta na ka liang ka ïingbishar ka la bthah ïa ka WFI ad-hoc body bad ka tnat ïalehkai jong ka sorkar pdeng ba kim pat lah ban pynlong ïa ka ilekshon tat haduh ban da lah pyndep ïa ka jingbishar.
Ka ïingbishar ka la pynbeit ban pynlong ïa ka jingbishar ha ka 17 tarik u Naitung.
