Guwahati, Jylliew:
Kumba la ïathuh ka kaiphot ba la phah da ka ASDMA, la ong ba ki la don palat 4,07,700 ngut ki briew kiba la shah ktah na ka jingshlei um ha Baksa, Barpeta, Darrang, Dhubri, Goalpara, Kamrup, Lakhimpur, Nalbari bad Udalguri distrik.
Ka jingshlei jong ka um ka la sdang ban duna ha kiba bun ki thaiñ, la ong u heh ba dei khmih.
Ki nongshong shnong ha kiba bun ki bynta jong ka jylla ki la hap ban kynriah jaka naba ka jingshlei um ka dang neh haduh kine ki sngi.
Ki bor sorkar ki la khmih bniah na ka bynta ban pynbiang ïa ki jingdonkam jong ki kiba manla ka sngi bad kumjuh ban khmih bniah ha ka ban ai jaka sah ba shipor na ka bynta kito ki bym don ïing ne jaka shuh ban sah.
Ki bor sorkar ki la shah bthah ha ki bor bahalor ba ki la dei ban pyntikna ba kin ym don ki briew kiba ïap na ka jingjia shlei um bad ban ïaleh katba lah ban pyllait im bad ban pynkynriah jaka na ka bynta jong ki sha ki jaka kiba lait na ka jingshlei um.
Ha kaba ïadei bad kane, u Myntri ka sorkar kmie jong ka tnat ki kam pohïing u Amit Shah u la ong ba u la ïakren bad u Myntri Rangbah jong ka Assam u Himanta Biswa Sarma bad u la kular ban pynbiang ka jingïarap sha baroh kiba donkam ha kaba ïadei bad ka jingshlei um.
“Na ka daw jong ka jingjur palat jong u slap kiba bun ki bynta jong ka Assam ki la ngat ha ka jingshlei um. Nga la ïakren bad u Myntri Rangbah jong ka jylla bad la kular ban pynbiang ïa ki jingdonkam katba lah,” la ong u Shah ha ka jingphah jingthoh lyngba ka Twitter.
Ki kynhun National Disaster Response Force (NDRF) ki la don lypa ha kiba bun ki jaka na ka bynta ban ai jingïarap bad pyllait im ïa ki lanot, bad la pynap ïa kiba bun ki kynhun na ka bynta ban ai jingïarap sha kiba donkam, u la bynrap.
