Khartoum, Jylliew:
Hadien ka jingiaumsnam kaba la jia ha Sudan kumba ar bnai mynshuwa kaba la ktah ia ka shongsuk shongsain jong kane ka ri, ka khubor kaba la ioh ka iathuh ba ka Sudan kan sa ioh ia ki lad jingiarap ka ban long haduh 1.5 billion. Kane ka wan hadien katto katne ki ri ka pyrthei ki la rai ban ai jing-iarap ia ka Sudan ha kum kane ka por jong ka jingeh bad jingjynjar. Kane ka jingai jingiarap jong ki katto katne ki ri ka dei ruh hadien ka jingkyrpad jong ka UN na ki ri kiba riewspah ba kin phaikhmat lem ban iarap na ka bynta ka Sudan ha kaba kum kane ka por.
Ka jingumsnam bad ka jinghiar thma ha kane ka ri kaba la long hapdeng ki Military bad Paramilitary Rapid Support Forces ban ioh synshar donbor ia ka Sudan ka la ktah bha ia ka jingim jong ki nongshong shnong kiba um don lad don lynti ban phai shano shano mynta.
Ka Health Ministry jong ka Sudan ha ka kaiphod ba la pynmih ha ka sngi saitjain jong ka taiew ba la lah ka la ong ba haduh 3,000 ki nongshong shnong ki la duhnoh ia la ka jingim tang namar ka jingpyni bor hapdeng kitei ki ar kynhun ha kaba kane ka la ktah ruh ia ka ioh ka kot jong kane ka ri. Ka khubor kaba la ioh ka iathuh ba ha ka jingialang ba la pynlong da ka UN ban iakren bad iamir jingmut ha kaba iadei bad ka Sudan ki ri kum ka Egypt, Germany, Qatar, Saudi Arabia, African Union bad ka Geneva la rai ban pynpoi ia ki lad jingiarap kham kloi sha Sudan.
U Secretary General ka UN u António Guterres ha ka jingiakren bad ki lad pathai khubor ula ong ba ka jingjot bad ka jingsniew ka la ktah bha ia ka Sudan bad donkam ban leh eiei noh kloi ban pynkut ia katei ka jingumsnam.
U Nongrah ktien ka UN sha Sudan ula dep ban maham tyngeh ba ka jingduhnoh jong ki mynsiem briew tang na ka daw jong ka jingkwah ban synshar donbor kan sa ktah bha ia kane ka ri bad hap ban pynsangeh noh ia kane.
