Shillong, Jylliew 27:
Ïa ka lympung Club World Cup 2023 yn pynlong ha ka nongbah jong ka Saudi Arabia ka Jeddah, la pynbna ka FIFA ha ka Lah Sngi U Blei.
Kane ka rai ka la wan hadien ba ka kynhun ki nongmihkhmat ka FIFA ki la leit jurip ïa ka Jeddah ha ka taïew ba la dep ban bishar bniah ïa ka jingpynkhreh na ka bynta katei ka lympung.
“Ngi sngewkmen eh ba ka Jeddah, kaba la biang lut nadong shadong bad kaba la ju pynlong ïa ki lympung ïalehkai bar ri, ka la shah jied ban pynlong ïa ka FIFA Club World Cup,” la pynpaw u President ka SAFF u Yasser Al Misehal.
Ïa kane ka lympung yn pynlong ha u Nohprah mynta u snem naduh 12 haduh 22 tarik bad kan long ka sien kaba nyngkong ban pynlong ha Saudi Arabia.
Ha kane ka lympung kin don hynñiew tylli ki kynhun bad naduh u 2025 ka ban long ha United States yn pynjlan shaduh 32 tylli ki kynhun.
