Manila, Jylliew:
Ki pulit jong ka Philippine ha ka Sngi Ba-ar ki la ioh ban pyllait im ia palat 1,000 ngut ki kynthei bad shynrang kiba la thmu ban shah pyntrei be-aiñ bad kiba la pynpoi sha Philippine naka bynta ki jinglehkai ‘Online Casino’ hapoh Manila.
Kitei ki 1000 ngut ki kynthup ia ki nong China, Vietnam, Singapore bad kumjuh ruh ki nong Malaysia bad la shem ia ki na kawei ka ïingmala hapdeng ka jingleit khynra jong ki pulit ha ka miet Sngi Nyngkong.
Ki pulit ki iathuh ba kitei kiba shah pynpoi be-aiñ shapoh ka ri, ki dei kiba la shah ialam bakla bad shah pynbiej ban trei kum ki ‘Assistant’ ha ki ‘Online Gaming’ lyngba jong ki jingpynbna ba la pyllait na Facebook.
La ong ruh ba ka la mih ka jingsngewkhia namar ka jing jur jong ki kam thok- kam shukor ha ki thaiñ Asia- Pacific bad bunsien ki kynthei ki ju shah shukor bad shah die- shah thied be-aiñ ha katei ka rukom.
Ki lad pathai khubor ha katei ka sngi ki la iohi ia 2 tylli ki bos bad 2 tylli ki trok pulit kiba la pynieng harud jong katei ka jaka bad ym shym la ailad ïano- ïano ruh ban rung shapoh jong katei ka jaka ha katei ka por.
Ki pulit kin dang wad bniah bad bud dien, ha ryngkat ruh ka jingtohkit bniah ban lap ia ki nongsuh buit bad ki nongpynïaid jong katei ka kam thok- kam shukor bad lada lap ruh yn pynshitom ia ki katkum ki kyndon aiñ ba la buh.
Ha u Jymmang, ki bor pyniaid ki la ioh pyllait im da ki hajar ngut ki kynthei na katto katne ki ri Asia.
