UK, Jylliew:
Katkum ki khubor la ong ba uwei u briew u la duh noh la ka jingim hadien ba ka parachute ‘Balloon’ kaba kit ia u ka la kem ding noh shiteng suiñ bad leit hap ha ki dieng jong ka khlaw Worcestershire. Kane ka la jia ha ka por kumba 6:20 jong ka step Sngi U Blei ha kaba ki nongsakhi ki la iohi ia katei ka balloon kaba rong ‘blue’ kaba la kylla pynban sha ka balloon ding hashwa ba kan hap noh syndon ha katei ka khlaw.
Ki briew jong ka kynhun pynlip ding bad ki pulit ki la leit ban mareh mar-mar tang mar ia ioh jingtip halor katei ka jingjia hynrei kim shym lah shuh ban pynlait im ia utei u nongshong ha katei ka balloon kaba long kum ka kynja ‘parachute’. Utei u briew u dang don ha ki rta kiba 20 snem bad la pynbna iap ia u naduh katei ka por ba lap ia u ha katei ka jingjia. Ka tnat pulit jong ka West Mercia ka la pyntip ba ha ka por kumba 6:20 jong ka step Sngi U Blei, ki la ioh ia ka jingpyntip ba don ka kynja balloon kaba kit briew bad kaba la kem ding bad leit hap ha katei ka khlaw hajan ka A449 ha Ombersley. Ka tnat Air Accident Investigation Branch (AAIB) ka la pyntip ba ka la phah ia ka kynhun na katei ka tnat naka bynta ban wad bniah halor katei ka jingkem ding jong ka parachute balloon ha katei ka sngi bad ban leh ia kaba donkam baroh.
