Nongstoiñ, Jylliew 27:
Ka shlem treikam jong ka District Sports Officer (DSO), West Khasi Hills ka la plie pyrda ïa ka lympung ïalehkai District Level Subroto Mukherjee Cup Football Tournament 2023 ha ka sngi Ba-ar ha madan NDSA, Nongpyndeng.
Ha ka Under-17 ki khynnah kynthei, ka BBC Secondary School Steplanglur ka la pynliem noh ïa ka Thomas Jones SS da 4-0 kol bad ka Jeol Gatphoh Memorial Secondary School ka la jop da 6-0 kol ïa ka Dapboklanh Giri Memorial SS.
Nangta, ka Assembly of God Secondary School Siejlieh ka la lah ban pynliem noh ïa ka Lowingwell SS da 3-0 kol, bad ka Church of God SS ka la jop da 3-0 kol ïa ka Don Bosco SS.
Ha ka Under-14 ki khynnah shynrang, ka Pingbah SS ka la pynliem da 2-1 kol ïa ka Anderson Higher Secondary School, ka Sib Singh Govt. Memorial HSS ka la ïasam mar shi dor-thong (point) ha ka jingïakhun pyrshah ïa ka Tynghor UPSS hadien ba ïakhaid mar 2-2 kol haduh kaba kut ka jingïalehkai.
Nangta, ka New Nongstoiñ SS ka la pynliem da 3-0 kol ïa ka Lad Nongsba PSS, katba ka Don Bosco SS ka la poi noh sha ka jingïakhaid da mar 1-1 kol bad ka Mawkaton Presbyterian UPS.
Haba phai sha ka jingïalehkai jong ka Under-17 ki khynnah shynrang, ka Joel Gatphoh HSS ka la pynjem khnap ïa ka Mawionglumsyntiew haduh 11-0 kol, ka Sib Singh Govt. Memorial HSS ka la pynliem noh da 7-0 kol ïa ka Nonglang HSS, katba ka Assembly of God SS ka la poi ha ka jingïakhaid da mar 1-1 kol bad ka Anthony SS, katba ka Rev.JJM SS ka la pynliem noh da 5-0 kol ïa ka BPL Secondary School.
