Shillong, Jylliew 27:
Ka Nongstoiñ College Higher Secondary School na West Khasi Hills ka la rah ïa ka nam lahduh ha ka jingïakob kyntip ba la tip kum ka ‘Fit India Quiz 2022’ ba la pynlong da ka Sports Authority of India hapoh kane ka Jylla.
Lyngba kane ka nam jop, kane ka skul ka la ïoh rung sha ka National Finals of Fit India Quiz 2022 ka ban sa long ha Mumbai.
Ki khynnah kiba la ïashim bynta na kane ka skul ki long u Banrap Wanñiang bad u Lapynshngaiñpat Kharbani. Kin ïohpdiang ruh ïa ka khusnam kaba T. 25,000 bad ka skul kan ïoh T. 2,50,000.
Ka Anderson Higher Secondary School na West Khasi Hills kan ïoh T. 1, 00,000 bad kin khynnah kin ïoh T. 10,000. Kumjuh ka Jawahar Navodaya Vidyalaya na East Khasi Hills kan ïoh ïa ka khusnam pisa kaba T. 50,000 bad ki nongïashim bynta kin ïoh T. 5,000.
Kat kum ka kyrwoh la ong ba baroh ki skul kiba la ïashim bynta ha ka State/UT rounds kin ïohpdiang ïa ka khusnam kaba T. 15,000 bad ki khynnah pule kiba ïashim bynta kin ïoh ïa ka khusnam kaba T.2,000.
Lah ban pynkynmaw ba kane ka jingïakob kyntip ki la don haduh 51 tylli ki skul kiba la ïashim bynta bad 8 tylli ki la ïoh rung sha ka State/UT Rounds.
Ki la don saw tylli ki skul kiba la jam sha ka final (state finals), kiba kynthup ïa ka Nongstoiñ College Higher Secondary School bad ka Anderson Higher Secondary School kiba na West Khasi Hills, katba ka Jawahar Navodaya Vidyalaya bad ka BSF Senior Secondary School kiba na East Khasi Hills.
Ka phang pdeng jong kane ka jingïakob kyntip (State finals of Fit India Quiz 2022) ka long halor ki kam ïalehkai bad ki jingkilanmet, la pynlong ha u Jymmang bad Jylliew mynta u snem.
