Jowai, Jylliew 27:
Ka North Liberty HS School ka la ïoh rung sha ka quarter final ha baroh ki kyrdan ïakhun jong ka Under-17 Boy, Under-14-Boy bad Under-17 Girls ha ka lympung ïalehkai District Level Inter School Subroto Cup Football Tournament.
Ïa kane ka lympung ïalehkai la pynïaid da ka shlem treikam u District Sports Officer, West Jaiñtia Hills ha madan Kiang Nangbah Stadium.
Ha ka jingïakhun jong ka Under-17 Boys kaba la long ha ka sngi Ba-ar, ka North Liberty HS School ka la pynliem ïa ka Ïalong Secondary School da 7-0 kol.
Ha ka Under-17 Girls, ka North Liberty HS School ka la pynliem ïa ka H.K. Singh Memorial Secondary School da 6-0 kol.
Ha ka Under-14 Boys, ka North Liberty HS School ka la pynliem ïa ka Little Flower HS School, Ummulong lyngba ka tie-breaker da 4-2 kol.
Kiwei pat ki skul kiba la ïoh rung sha ka quarter final ki long ka Jowai Govt. UP & RMSA School, kaba la pynliem ïa ka Amwi HS School, Thangbuli da 4-3 lyngba ka tie-breaker.
Ka Govt. Boys HS School ka la pynliem ïa ka Moosachram UP School da 4-3 lyngba ka tie-breaker bad ka RC Eve Secondary School ïa ka JNM Secondary School, Lamin da 6-0 kol.
