Rung quarter ka Umpohliew, ARPS, H. Elias, Umphyrnai ha ka Under-14

Haduh kaba kut ka jingïalehkai kaba ar, ki la don 6 tylli ki kynhun kiba la lah ban pynthikna ban jam sha ka quarter final.

Shillong, Jylliew 27:

Ka Umpohliew Jingtip HSS, Assam Rifles Public School, H. Elias Memorial H.S.S bad ka Umphyrnai Presbyterian School ki la jam sha ka quarter final ha ka Under-14 jong ka District Level Inter School Subroto Mukherjee Cup Football Tournament 2023 ba la pynïaid da ka shlem treikam u District Sports Officer (DSO) East Khasi Hills.

       Ha ka jingïalehkai jong kane ka kyrdan kaba la long ha madan Heh Mini Stadium kaba ha Mawlai Phudmuri, ka Umpohliew Jingtip HSS ka la lah ban pynliem ïa ka Vilco Secondary School haduh 14-0 kol. U Gilbert Rapsang u la thep saw kol ha ka minit kaba 18,32,34 & 42, u Wanshai Kurbah (14,35 & 38) bad u Jimson Kharkrang (20,30 & 37) ki la khur ïa ka hat-trick, ïa ki ar kol la thep da u Jopbor Kurbah (9 & 45), katba ïa ki shi kol la thep da u Mickyland Rapsang (12) bad u Nangsanbha Rapsang (39).

       Ka Assam Rifles Public School ka la pynliem ïa ka Lumpyllun Govt. L.P/U.P School haduh 11-1 kol. U V. Malsawmkima u la khur ïa ka hat-trick hadien ba u la ïoh ban thep ha ka minit kaba 22, 38 & 50. Ïa ki ar kol la thep da u Robindor Kyrsian (3&5). Katba ïa ki shi kol la thep da u Medonbanshan Kurkalang (8), Lalramdinmawia Varte (13), Starbor N. Jana (19), C.Ruat Sangpuia (36), Dhandeep Chetia (44) bad u Louis Boragohain (45). Na ka liang ka Lumpyllun ka la ïoh pynphai kylla shi kol lyngba u Diengshanlang Jana (52).

       Ka H. Elias Memorial H.S.S ka la pynliem noh ïa ka St. John Bosco Boys’ H.S.S. da 7-0 kol. U Evanmi First Stone Suchiang u la thep marwei haduh saw kol ha ka minit kaba (12, 27, 40 & 42), ïa ki ar kol la thep da u Iborlang Khongtim (29 & 54) bad ïa kawei pat la pynbud da u Joseph Kharkuri (34).

       Ka Umphyrnai Presbyterian SS ka la jop ïa ka St. Anthony’s HSS da 3-2 kol. U Dathrangki Nongtraw (37 & 60+3) u la ïoh ban thep ar kol, mar shi kol la thep da u Ricky Kharkongor (37) bad u Bankitbok Mylliemngap (44), katba u Dathrangki Nongtraw (37 &60+3) u la lah ban pynphai kylla ar kol na ka bynta ka St. Anthony’s.

       Kiwei pat ki kynhun kiba la ïoh rung na kane ka group ki long ka Sacred Heart Boys’ H.S.S (Mawlai), Tlong Umïam SS, Ïewrynghep SS bad ka O.M. Roy Memorial H.S.S. Kine ki kynhun kin pynkhreh ban ïakhun quarter ha ka sngi Balang ha madan Heh.

       Haba phai sha ka Under-17 ki shynrang, ka Sacred Heart Boys’ H.S.S ka la pynliem noh ïa ka Umpohliew Jingtip H.S.S lyngba ka shi kol ba la thep da u Balamphrang Wahlang ha ka minit ba 46.

       Ka Assam Rifles Public School ka la jop ïa ka Vilco Secondary School da 4-0 kol. U Ratson Lingu u la ïoh ban thep ar kol (11 & 32), katba ïa kiwei pat la pynbud da u Milli Putum (17) bad u Milli August (44).

       Ka Phila Rapsang Memorial SS ka la pynliem noh ïa ka St. Anthony’s HSS lyngba ka shi kol ba la thep da u J. Andy Wilson Nongkhlaw ha ka minit kaba 42.

       Ka H. Elias Memorial HSS ka la jop da 4-0 kol ïa ka Govt. U.P.S, Mawryngkneng. U Yohan u la thep ar kol ha ka minit kaba 16 & 54, katba ïa ki shi kol la thep da u B. Marboh bad u J. Mawa (56).

       Haduh kaba kut ka jingïalehkai kaba ar, ki la don 6 tylli ki kynhun kiba la lah ban pynthikna ban jam sha ka quarter final. Kine ki kynthup ïa ka Tyrsad H.S.S, Umphyrnai Presbyterian SS, Sacred Heart Boys’, Assam Rifles, Phila Rapsang Memorial bad ka H. Elias Memorial.