Nongstoiñ, Jylliew 27:
Ha ka 26 tarik mynta u bnai ki pulit ka West Khasi Hills ki la kem noh ïa saw ngut ki briew kiba la suba jur ba ki dei ki trai ba pynïaid be-aiñ ïa ki karkhana thang dewïong (coke plant) ha thaiñ Shallang, West Khasi Hills District.
U Superintendent of Police ka West Khasi Hills District u Bikram D Marak u la ïathuh ba ha kaba ïadei bad ki karkhana thang dewïong be-aiñ ha Shallang kaba long katkum ka case vide Shallang PS Case No.39(12)2022, ki pulit ki la ïoh ban kem saw ngut ki briew kiba suba donkti ha katei ka kam.
Shuh shuh la ong ruh ba kitei saw ngut kiba la shah kem ki dei kiba la tip kyrteng kum u Ashish Arya (32 snem) uba na Basisthapur Bye-Lane No 3, Guwahati, Kamrup, Assam, u Khrawbok Rongrin na Sohbar A, Shallang, u Hopeful Nongtdu na ka shnong Rymbai Synrang Shahkhain, East Jaiñtia Hills bad u Yaman Bansal (28 snem) na Beltola Tiniali Guwahati, Kamrup Assam.
Ka khubor na ki heh pulit ka district ka la ong ruh ba ïa kitei saw ngut ba la kem la phah sha ka Judicial Custody.
