Shillong, Jylliew 27:
Haduh lai ngut ki la shah sei red card hashwa ba ka India bad ka Kuwait kin ïasam mar shi point ha ka SAFF Championship 2023, hadien ba ki la ïakhaid mar 1-1 kol ha ka sngi Ba-ar ha Sree Kanteerava Stadium.
Kine ki kynthup ïa u coach ka India u Igor Stimac ryngkat u rangïalehkai u Rahim Ali lem bad u rangïalehkai ka Kuwait u Alqallaf, kiba la shah beh shi syndon na madan ïalehkai.
Ha kane ka jingïalehkai kaba khatduh jong ka Group-A, baroh ar kynhun ki la pyrshang ban ïakhun tyngeh naduh kaba sdang ha kaba ki la ïoh ïa ki kabu kiba biang, hynrei kim shym la lah ban pynurlong.
Ha shwa ban kut ka jingïalehkai jong ka kylla step, ka India ka la ïoh ban pynkhih jar nyngkong eh lyngba u Sunil Chhetri ha ka minit kaba 45+2.
Kane ka shi kol ka la pynlong ïa ki ’rangïalehkai ka India ban ïai bteng ha ka ban ïakhun tyngeh ha ka kylla miet bad kumjuh ka Kuwait kaba dang donkam ban pynphai tangba kim shym ïoh ban pynkhih jar.
Kham ha shwa ban kut ka jingïalehkai ka Kuwait ka la lah ban pynurlong ban pynïakhaid kylla shi kol na ka daw ka jingbakla thep hi u Anwar Ali ha kaba u ’rangapkol ka India u Amrinder Singh um shym lah ban pyllait na ka jingshah thep.
Wat la kine ki kynhun ki la kamai mar 7 point haduh kaba kut ka jingïalehkai kaba khatduh jong kane ka group, hynrei ka Kuwait ka la ïai bat ïa ka kyrdan ba hakhlieh lyngba jingïapher kol.
Haba phai sha ka Group-B, kaba dei ka jingïakhun kaba khatduh bad ka jingïaknieh ban ïoh rung semi final ka ban long ha ka sngi Balang hapdeng ka Lebanon pyrshah ïa ka Maldives ha ka por 3:30 janmiet, katba ka Bhutan ïa ka Bangladesh ha ka por 7:30 mynmiet.
Kumba ka paw ka Lebanon ka la ïoh ban lamkhmat ha kaba la kamai 6 point na ki arsien ïakhun, katba ka Bangladesh bad ka Maldives ki don mar 3 point.
