Mairang, Jylliew 28:
Kum shi bynta ban pynmih pisa na ka bynta ka Kynshi Bangla LP School kaba don hapoh ka shnong Kynshi Bangla, Eastern West Khasi Hills, ka Kynshi Bangla Sports and Cultural Club kan sa pynlong ïa ka lympung ïalehkai phutbol ba la tip kum ka Knockout Football Tournament balai sngi ka ban long ha ka 1, 3 bad 11 tarik u Naitung hapoh madan ïalehkai jong ka shnong Kynshi Bangla.
Ki nongkitkam katei ka synjuk ki la pyntip paidbah ba ha kane ka lympung ka jingïalehkai kan long beit tang na ka bynta ki saw tylli ki kynhun. La ong ruh ha kane ka jingïalehkai yn pynlong beit da ka jingïakhun semi final ka ban sdang naduh ka 1 tarik u Naitung 2023 hapdeng ka MLP F.C pyrshah ïa ka 7Wasa FC, bad ka semi final ba ar kan long ha ka 3 tarik hapdeng ka Seven Brothers pyrshah ïa ka Khliehmawlieh YC.
Kumta kane ka klob ka la kyntu ruh ïa ki paidbah na kane ka thaiñ kiba ïeid bad kiba smat ban peit ïa ki jingïalehkai phutbol ba kin wan kyrshan lem ïa kane ka lympung kaba long kum shi bynta ban pynmih pisa na ka bynta ka skul Kynshi Bangla L.P School ka bym shym pat la ïoh jingïarap eiei haduh mynta.
Nalor kane, la pyntip ruh ba ka bai tiket ha kine ki ar tylli ki jingïakhun semi final kan long tang T. 50 tyngka marwei, katba ha ka jingïakhun final ka ban long ha ka 11 tarik ka bai rung kan long T. 100 tyngka.
