Da lei-lei ngim shah ban rah ïa ki tiar ba dang sah ha MCH Nongstoiñ, ong ki 5 Seng

hynrei wat ïa kawei ka tnat sorkar ïa kaba ka Myntri ka la buh ban ïakynduh ruh kim lah shuh ban kynduh namar ka jingdkoh ha ka lad ai jingtip.

Nongstoiñ, Jylliew 28:

Ki san tylli ki seng na West Khasi Hills District ba kynthup ïa ka West Khasi Student Union, ka Western Youth Federation Sengkmie, UHM West Khasi Hills District, ka Hynñiewtrep Achik National Movement West Khasi Hills bad ka MYF ki la pynpaw ïa ka jingbymhun halor ka jingbym lah ka Sorkar Jylla ban ai ka jingtip kaba tikna ha kaba ïadei bad ka jingwan jong ka Kong Ampareen Lyngdoh, ka Myntri ka tnat ka koit ka khiah ban jurip ïa ki jaka sumar ha ka 26 tarik mynta u bnai ha Nongstoiñ.

            Ki nongïalam jong kitei ki seng ki la ïathuh ba ha ka 19 tarik u Jylliew, ki san seng na West Khasi Hills ki la ïoh ban ïakynduh bad ka Kong Ampareen Lyngdoh ha ryngkat ka dorkhas ba ki la aiti ha kaba ïadei bad ka Maternity Children Hospital (MCH) Nongstoiñ ha kaba ka la kular ban ïakren ïa kane ka mat ym ha Shillong hynrei ynda ka la wan jurip hi ïa katei ka hospital bad ïa ki jaka sumar ha Nongstoiñ. Pynban kaba lyngngoh pat ynda la wan ban jurip ka Kong Ampareen ym shym la don kano-kano ka jingpyntip la ka long ïa ka jaka bad por kaba kumno yn pynlong ïa kata ka jingïalang kumba la kular.

            Halor katei ka bynta, ha ka sngi Balang ka taïew, ki san seng ki la leit ruh ban ïakynduh ïa ka DMHO West Khasi Hills kumjuh ïa u DC ka West Khasi Hills ban pan jingshai halor katei ka jingwan jong ka Kong Ampareen.

            Shuh shuh ki la ong ba dei halor kane ka nongrim ba ki san tylli ki seng kim shym la hun bad da kawei ka sur ki la shim ïa ka rai ban ïeng ha ka nongrim kumba la dep buh ka jingthoh ha u Deputy Commissioner ka WKH ban nym shah da lei-lei ban kit lane rah ïa ki tiar ba dang sah na MCH Nongstoiñ sha South West Civil Hospital.

            Ki la ong ruh ba kum ki kynhun seng ki dap da ka jingsngew lyngngoh ha kaba hadien ka jingbuddien mynta ka sngi la ïoh jingtip ba ym dei tang ïa ki kynhun ba ka dkoh ka jingai jingtip, hynrei wat ïa kawei ka tnat sorkar ïa kaba ka Myntri ka la buh ban ïakynduh ruh kim lah shuh ban kynduh namar ka jingdkoh ha ka lad ai jingtip.

            Kumta na ka liang ki san seng ki pynrem jur ïa kane ka jingleh lyndet bad kular kai haba ïadei ban ïathir ïatai ïa kane ka mat kaba dei kaba donkam tam ha ka dong ka thaiñ jong ka West Khasi Hills.