Shillong, Jylliew 28:
Uwei u nongshong shnong ka West Garo Hills u la mudui da ka mukotduma ‘Public Interest Litigation’ (PIL) ha Meghalaya High Court halor ka jingkhyllem ka kynroh jong ka PA Sangma Sports Complex ha Tura bad la kynnoh ba ka don ka jingshna torti ïa kane ka jaka.
U Amit R. Marak u la leit mudui hadien ba tang hynriew bnai ba la plie ïa ka Stadium, shi bynta jong ka kynroh ka la khyllem noh ha ka 22 tarik Jylliew, 2023. Kane ka jingkhyllem ka la wanrah ïa ka jingtwa khyndew kaba jur bad ka la ktah ruh ïa ka madan ïalehkai phutbol, la ong u nongmudui.
Ha ka jingmudui, u Marak u la ong ba ha ka 4 tarik Lber, 2020, u Myntri Rangbah ka jylla Meghalaya u la buh ïa u mawnongrim ban tei ïa ka PA Sangma Sports Complex. Ha ka 31 tarik Nailar, 2020, la khot ïa ka Notice Inviting Tender (NIT) ban shna ïa kane ka jaka ha ka dor T. 127 klur. Ïa kane ka NIT la khot da ka Hindustan Steelworks Construction Limited, bad hadien ba la dep ban peit ïa ki kot ki sla, la jied ïa ka Badri Rai Constructions Pvt. Ltd. ban shna ïa katei ka Sports Complex.
Ha ka 17 tarik Nohprah, 2022, u Myntri Rangbah u la plie ïa ka Football Stadium ryngkat bad ki artylli ki Indoor Stadium, bad ïa kane ka jingplie, la thoh da kiba bun ki lad pathai khubor. U Marak u la pynkynmaw ba ka sorkar jylla ka la pynksan ba ïa katei ka Football Stadium kaba long shi bynta na ka Sports Complex la dep ban shna bad la plie ha u Nohprah 2022, bad la lah ban pyndonkam ïa ka da ki paidbah.
Nalorkata, ha ka jingmudui la kdew ba u kontraktor uba la pyntrei ïa ka kam u dei u bym da don jingtip bha kumno ban pyntrei ïa ki jingtei kiba heh. La kdew ruh ba wat hadien ba la dep ban pyni ïa kiba bun ki jingduna ha ka rukom shna, ki bor sorkar kiba dei khmih ki la leh kum bym ïohi.
Kaei kaba paw shai, katkum u nongmudui, ka long ba ka jingtei ïa ka Stadium ka long kaba duna haduh katta katta bad ka bym ïaid beit. La kynnoh ruh ba ki bor sorkar ki khlem leit khmih ha ka por ba la pyntrei ïa katei ka stadium na ka daw ki bym lah ban tip. U la kdew ruh ba ka jingtei ïa ka Sports Complex ka long haduh 127 klur tyngka.
U nongmudui u la kyrpad ba ka dei ban don da ka jingtohkit kaba bniah da ka kynhun kaba laitluid lane da ka kynhun ka ban hap hapoh ka jingkhmih ka High Court halor ka jingkhyllem jong ka kynroh bad ka rukom shna ïa katei ka madan ïalehkai bad hadien kata, ban leh da kaba tyngeh ïa ki kontraktor bad ïa ki heh sorkar kiba hap shim jingkitkhlieh.
Na ka liang ka Division Bench jong ka High Court ha ka Sngi Balang ka la bthah ba dei ban ai shithi lane notice sha baroh kiba hap ban jubab ïa katei ka mukotduma. Ka High Court ka la ong ruh ba ka Hindustan Steel Works Construction Limited, kaba dei ka shnong jong ka NBCC India Ltd), ka dei ban pyni la u kontraktor u la bud ne em ïa ki jingbthah ha kaba ïadei bad ka rukom shna ïa ka stadium bad ka por ba u kontraktor u ïoh ban pynbeit ïa ki jingduna ha ka jingtei.
Nalorkata, ka jingmudui ka long ruh pyrshah ïa u Managing Director/ Director, ka Badri Rai Constructions Pvt. Ltd., kaba don ïa ka shlem treikam ha Station Road, Duliajan, Assam.
Ha kawei pat ka liang, ka High Court ka la bthah ïa ka sorkar ba kan pynkhuid bad kit noh ïa ka khyndew kaba la lang ha ka surok kaba don markhap bad ka PA Sangma Stadium khnang ba ki paidbah kin ym ïakynduh jingeh.
U muktiar jong u nongmudui, u Advocate Sujeet Dey, u la ong ba nalor katei ka Stadium, ki la don ruh sa artylli kiwei pat ki jingtei ïa ki madan ïalehkai ha Rilum Garo kiba la kynnoh ba ka jingtrei kam long satia kaba biang. Ha kaba ïadei bad kine ki artylli ki jingtei ruh, u Sujeet Dey u la ong ba yn sa rah da ki ‘video’ ban pyni sha ki nongbishar ka High Court.
