Shillong, Jylliew:
Ka Khasi Hills Autonomous District Council (KHADC) kaba ju ïoh pisa lyngba ka jingïasam ïa ka bhah bad ka Sorkar Jylla, ka la ïoh ïa ki jingai jingmut na ki MDC ha kaba la kyntu ïa ka Executive Committee ban dawa noh na ka Sorkar Jylla ban ai jingkheiñ kaba shai haba ïadei bad ka jingïasam ïa ki jingïoh kiba dei hok jong ka Council bad ban kyntiew noh ïa ka bhah halor ki khajna na ki mar poh khyndew na ka 25% sha ka 35%.
Ïa kane ka mat la wanrah da u MDC na Mawkynrew u Bah Martle N Mukhim uba la wanrah ka mat ïatai ha Ïingdorbar KHADC ha ka Lah Sngi U Blei.
U Bah Martle u la ong ba ka KHADC ka shu pdiang ïa ka jingïoh lyngba ka bhah hapdeng jong ka bad ka Sorkar Jylla hynrei kam don satia ka jingkheiñ kaba shai katno ka KHADC ka dei ban ïoh bad ïasam na ka jingmih baroh kaba ïohlum na ki khajna halor ki mar poh khyndew bad kiwei kiwei ki khajna kiba dei ban ïasam.
U la ong ruh ba ka Sorkar Jylla ka dei ban pyllait kloi sha ka KHADC ïa ka bhah kaba dei hok ym ban pynslem bad bat sah ïa ka pisa kaba ka Council ka dei ban ïoh la ka dei ka pisa ba lum na ki khajna halor ki mar poh khyndew, khajna halor ki kali bad kiwei kiwei ki jingïoh kiba ju ïasam hapdeng ka Sorkar Jylla bad ka Council.
Kumta u la kyntu ïa ka Executive Committee ba kan shimkhia ïa kane namar ba ka Council kam dei ban paw ba ka long nongkhrong hakhmat ka Sorkar Jylla ïa la kajong ka bhah kaba dei hok ban ïoh lyngba ka jingïasam ïa ki khajna kiba la ïohlum. Kumta u la ong ba ka jingïasam ïa ka khajna kaba ïohlum na ki mar poh khyndew ka dei ban kiew noh na ka 25% sha ka 35%.
Na ka liang u CEM barim, u Bah Titosstarwell Chyne u la bynrap lang ba ka Council ka im bad ïoh pisa ban pynïaid ïa ki kam kiba bun namar ka bhah kaba ju ïasam hapdeng ka Council bad ka Sorkar Jylla.
Nalor kane, u kren ruh shaphang ka jinglait tuh ki khajna na ki mar poh khyndew bad ka jingbym ïoh lum tikna ka Sorkar Jylla ïa ka khajna na ki kali kamai ki bym siew khajna bad kiba shu kamai beaiñ.
Haba jubab halor kane ka mat ïatai, u Executive Member uba peit ïa ka tnat khajna, bad ka tnat Mines and Minerals, u Bah Fantin J Lakadong, u la ong ba ka EC kan shimkhia ïa kane bad thoh sha ka Sorkar Jylla haba ïadei bad ka jingïoh lum pisa na ki khajna bapher bapher bad yn thoh ruh ban dawa kyntiew noh ïa ka bhah halor ki mar poh khyndew na ka 25% sha ka 35%.
