Nongstoiñ, Jylliew:
Kum shi bynta jong ka jingrakhe ïa ka International Day Against Drug Abuse & Illicit Trafficking 2023, ka shlem treikam jong ka District Social Welfare Officer, West Khasi Hills District, Nongstoiñ ha ka Sngi Ba-ar ka la pynlong ïa ka prokram pynsngewthuh paidbah halor ka phang “People first: stop stigma and discrimination, strengthen prevention” lane “Ka mynsiem briew kaba tam: sangeh ka peit kynriang bad ñiewbeiñ, pynkhlaiñ ïa ki lad jingïada” ïa kaba la pynlong ha ka skul St John Bosco Higher Secondary School, Rambrai.
Ha kane ka sngi, la sakhi ïa ka jingïashimbynta shit rhem jong ki khynnah na ki skul bapher bapher jong ka thaiñ Rambrai ha ka jingïaid rally pyrshah ïa u drok, kaba la sdang na ka skul United National Secondary School, Mawrang ter ter shaduh ïew Rambrai. La pynkut ïa kane ka jingrakhe da ka prokram pynsngewthuh paidbah ha St John Bosco Higher Secondary School, Rambrai halor ka jingma kiba mih na ka jingdih drok.
U BDO jong ka Rambrai Block, Bah S Marweiñ uba la leit kum u kongsan ha kane ka prokram, ha ka jingkren ka jong u sha ki khynnah skul, ki nongtrei ASHA, ki nongtrei Anganwadi bad paidbah jong ka thaiñ Rambrai, u la kyntu jur ïa baroh, khamtam eh ïa ki khynnah skul ba horkit-hordang kim dei ban ngop ha ka jingdih drok namar u drok u ai jingkmen tang shipor namar lait nangta sa tang ki jingeh kin wan ban tap ha ka jingim ka jong ki.
U la ong ba ki khynnah skul ki dei ban trei shitom bad minot thop ha ka jingpule ka jong ki khnang ba ki lah ban tei pynbha ïa ka imlang ka sahlang. U la ban ruh ba ka jingpyndonkam ïa u drok ka ktah ïa ka met ka phad, ka jingmut jingpyrkhat, ïa ka imlang ka sahlang bad ka ktah ruh ïa ka ïoh ka kot bad kumta donkam ban rat dyngkhong ïa une u jingsniew napoh ka imlang ka sahlang.
Ha kane ka sngi, u kongsan u la ïoh ruh ban pyllait paidbah ïa kawei ka sur jingrwai kaba la rwai da ka Kong Joymery Khardewsaw ïa kaba la ïarap pynmih da ka shlem treikam jong ka District Social Welfare Officer Nongstoiñ. Kane ka sur jingrwai ka ïawer bad kyntu ïa baroh ba kin kiar na ka jingdih bad pyndonkam ïa u drok.
Ïa kane ka prokram la pynïaid da ka Kong S Iawphniaw ha ka jingdon ryngkat jong ka Kong VC War, District Social Welfare Officer, West Khasi Hills District kaba la ïalam ban pule ïa ki jingkular halor katei ka phang pdeng ha baroh kiba wan ïashim bynta ha katei ka prokram.
Kiwei pat ki ‘riewshemphang kiba la ïadon lang ha katei ka prokram pynsngewthuh paidbah halor u drok ki kynthup ïa ka Kong I Shadap kum ka Clinical Psychologist, Nongstoiñ, u GK Sangma kum u Inspector of Police, bad ka Kong G Thongni kum ka Counsellor jong ka Kripa Foundation. Kine baroh lai ngut ha ka jingkren, ki la kyntu bad wer lang ïa baroh ban kiar na ka jingdih drok. Ki la kyntu ruh ba ka donkam ïa ka jingïatreilang jong baroh khnang ban lah rat dyngkhong ïa u drok napoh ka dong ka thaiñ hi baroh kawei.
Nalor kane, ki la kyntu ruh ïa ki paidbah baroh ba kim dei ban ñiewbeiñ ne ban peit kynriang ïa kino-kino ki briew kiba la kyrni ha ka jingdih drok hynrei ki dei ban ïarap ïa kum kita ki briew khnang ban ïoh pynbha pat ïa ka jingim ka jong ki.
