Shillong, Jylliew:
Ka ilekshon MDC kaba dang sah satang phra bnai eiei lada jia ba long ha u ‘nai Rymphang, 2024, hynrei ka lyer ban pan tiket ban ïakhun na ka seng Voice of the People Party (VPP) ha Mawlai konstitwensi ka la sdang beh ïa ka kyrteng u Bah Marbud Dkhar hadien ba u la mih noh na ka seng Congress ha kine ki khyndiat bnai.
Kum ban shu pynkynmaw u Bah Marbud Dkhar u dei u kyrtong ka seng Congress ha kane ka ilekshon MLA ba dang shu dep, hynrei u la shah rem noh. Tang hadien katto katne bnai u la mih noh na kane ka seng ban leit pynïasoh noh ïalade bad ka VPP kaba ki paidbah ki la jied ïa u Bah Brightstarwell Marbaniang kum u MLA uba dei u kyrtong jong kane ka seng.
Kane ka jingrung VPP u Bah Marbud ka la paw pyrthei hadien ba u la trei shit rhem bha ban ïarap kam ne ban trei mon sngewbha haba u Bah Ardent M Basaïawmoit u la pynlong ka jingshong shah thngan hakhmat Additional Secretariat.
Wat la ki khubor kim pat da shai bha, hynrei ki khubor kiba ïajan bha haduh mynta ki ïathuh ba kiba pynkhreh ban pan tiket na ka VPP na Mawlai konstitwensi ha kane ka ilekshon MDC ka dei tang ka kyrteng u Bah Marbud Dkhar.
Ki khubor ki ïathuh ban rai ïa ka tiket kan dei ruh ka jingsngewthuh jingmut lang bad u MLA ka VPP ba mynta u Bah Brightstarwell Marbaniang ryngkat u President ba rangbah ka VPP Bah Ardent Basaïawmoit.
Kum ban shu pynkynmaw ha ka ilekshon MLA u kyrtong ka VPP Bah Brightstarwell Marbaniang u la ïoh haduh 25,000 vote.
