Shillong, Jylliew 28:
Ka Jylla sa shisien ka la duh noh ïa uwei na ki nongïalam barim ka Meghalaya State Olympics Association (MSOA) u Chiranjib Choudhri uba la khlad noh na kane ka sla pyrthei ha ka step jong ka Sngi Balang.
U Chiranjib u la bat kam kum u General Secretary haduh hynñiew snem kynthih naduh u 2015 haduh u 2022.
Na ka liang ka MSOA lyngba ka kyrwoh ba la pyllait da u Bah Finely Pariat, General Secretary u la pynpaw ka jingsngew kyndit halor kane ka jingkhlad kynsan jong utei u rangbah. Kane ka synjuk ka la pynlong ruh ïa ka jingïalang ha ka Sngi Balang ha ka por 12 baje mynsngi da kaba pynlong ka jingsngap jar kaba shi minit ban pynpaw ka jingsngewlem halor kane ka jingkhlad noh ka jong u.
Hadien ba la wai ka jingïalang, u Working President ka MSOA, Bah John F. Kharshïing ryngkat u Bah Ian Lyngdoh bad ki dkhot kane ka synjuk ki la leit ban aiti ïa ka shithi sngewlem sha ki bahaïing hasem ha ka ïingsah jong utei u rangbah ha Last Stop, Laban.
