Shillong, Jylliew 28:
Ka Manchester City ka la pyndep pura ïa ka jingïasoi kontrak na ka bynta u ’rangïalehkai shapdeng ka Chelsea u Mateo Kovacic na ka bynta saw snem ha ka jingsiew kaba 25 million pounds (USD 31.9 million) nalor kiwei pat ki jingsiew.
Une u ’rangïalehkai shapdeng ba dang 29 snem ka rta, uba la ïadon bynta bad ka Chelsea ban khur jingjop ha ka Champions League ha u 2021, u la long uba nyngkong eh ban pynïasoh sha ka City naduh ba ka la khur ïa lai tylli ki nam jop ha ka aïom ba la dep.
Katei ka kynhun jong u Pep Guardiola kaba la khur ïa ka nam lahduh ha ka Premier League, Champions League bad ka FA Cup, ka la long ka kynhun kaba ar na England ban kynjoh sha kane ka thong.
Na ka liang u Kovacic u la pynpaw da kaba ong, “Kane ka long kaba biang eh ïa nga ban pynïasoh sha kane ka klob bad ngam sngew lah ban ap ïa ka jingsdang ka jingïalehkai bad ka City. Baroh kiba peit ïa kane ka kynhun hapoh ka jingïalam u Pep ki tip bha haduh katno ka long kaba biang eh ïa nga namar ka long ka kynhun kaba kynsai ha ka pyrthei.”
“Kane ka la wan urlong ha ka kam ïalehkai phutbol ka jong nga ban pynïasoh sha kane ka kynhun namar ka la lah ban khur ïa ki trophy ha ki lympung ïalehkai,” u la bynrap.
Kane ka jingpynïasoh u Kovacic kan ïarap ban nang pynkhlaiñ ha ka bynta kaba shapdeng hadien ba u Ilkay Gundogan u la pynkut noh ïa ka kam ïalehkai bad kane ka klob hadien hynñiew snem na ka bynta ban leit ïasoh bad ka Barcelona kum u ’rangïalehkai uba laitluid.
Kham ha shwa u Kovacic u la ïalehkai na ka Inter Milan bad Real Madrid. U la ïadon bynta bad ka kynhun ïalehkai jong ka Madrid kaba la khur ïa ka nam lahduh haduh lai sien ha ka Champions League naduh u 2016 haduh u 2018.
Une u ’rangïalehkai u la mih noh na ka Chelsea ha ryngkat kiwei pat ki ’rangïalehkai kiba la leit ïasoh sha kiwei pat ki klob. Kine ki kynthup ïa N’Golo Kante (Al-Ittihad) bad u Kalidou Koulibaly (Al-Hilal) kiba la leit ïalehkai noh sha Saudi Arabia, katba u Kai Havertz bad u Mason Mount ki dang ïai khmih lynti ban pynïasoh sha ka Arsenal bad Manchester United.
Kumba ka paw u Kovacic u la ïoh ban ïalehkai haduh 227 sien na ka bynta ka Chelsea bad ïoh thep hynriew kol. Nalor ka Champions League, u la ïadon bynta ban khur jingjop ha ka Europa League, Super Cup bad ka Club World Cup.
