Shillong, Jylliew 28:
Ka Lebanon ka la pynliem noh ïa ka Maldives da 1-0 kol na ka bynta ban bat ïa ka kyrdan ba hakhlieh jong ka Group-B bad ban ïoh rung sha ka semi final ha ka SAFF Championship.
Lyngba kane ka jingjop ka Lebanon kan ïakynduh pyrshah ïa ka India ha ka sngi Saitjaiñ na ka bynta ban ïaknieh rung sha ka final.
Katei ka nam jop jong ka Lebanon ka la wan urlong lyngba ka shi kol ba la thep da u kapten u Hassan Maatouk, uba la ïoh ban shut ïa ka free-kick ha ka minit kaba 24.
Ka Lebanon ka la long ka kynhun kaba kynsai ha kane ka lympung namar ka lah khur jingjop ha baroh lai sien ïakhun ha ka Group-B bad kamai 9 dor-thong (point).
Dangshen kitei ki kynhun ki la ïakynduh teng ha ka final jong ka Intercontinental Cup kaba la long ha Bhubaneswar bad ka India ka la khur ïa ka nam lahduh.
Katba ka Maldives kaba don ha ka kyrdan 154 ha ka pyrthei, ka la khmih lynti ban ïakhun tyngeh pyrshah ïa ka Lebanon, ka bym ju lah ban pynliem ha ki jingïalehkai ba la dep.
Haba phai sha ka Kuwait kan ïakynduh semi final pyrshah ïa ka Bangladesh, kaba la wan ba-ar na ka Group-B hadien ba ka lah ban pynliem noh ïa ka Bhutan da 3-1 kol.
