Shillong, Jylliew 29:
Ka India ka la kynjoh mynta sha ka kyrdan kaba 100 kat kum ka jingpyllait ka FIFA ïa ki kyrdan jong ki ri ka pyrthei ha ka Sngi Palei.
Ka India ka la kamai 4.24 point na ka daw ba ka jop san sien bad ïakhaid ar sien na ki hynñiew sien ïakhun mynta u bnai ha ka Intercontinental Cup bad ha ka SAFF Championship.
Kane ka kynhun ïalehkai ka ri ka la jam ruh sha ka kyrdan ba 18 napdeng ki kynhun ha ka Asian Football Confederation (AFC). Kane ka long ruh ka jingkiew kyrdan kaba kham heh ha shwa ba kan shah pynïakap na ka bynta ka lympung ïaknieh rung World Cup (qualifier) ka ban sa long mynta. Ka jingshah rem ka Lebanon ha ka India ha ka final jong ka Intercontinental Cup ka la pynlong ban duh ei shi point.
Kane ka mut ba ka India ka lah ban don ha ka Pot 2 jong kane ka jingpynïakap na ka bynta ka wat ba ar jong ka World Cup qualifiers, bad ka Lebanon ka la shah pynhiar sha ka Pot 3. Hynrei ka dang don jingkyrmen ban ïoh jaka lang bad ka India, ka ban ïakynduh pyrshah ïa ka Lebanon ha ka semi final jong ka SAFF Championship ka ban long ha ka sngi Saitjaiñ ha Bengaluru.
Ka jingjop ka India da 2-0 kol ïa ka Lebanon ha ka Intercontinental Cup final ka la wan urlong lyngba ki kol u Sunil Chhetri bad u Lallianzuala Chhangte ha u bnai ba la dep.
