Shillong, Jylliew 29:
Ka sorkar jylla ka lah ban ym pynlong ïa ka ilekshon MDC ha u snem 2024 na ka bynta ka Khasi Hills Autonomous District Council (KHADC) bad Jaiñtia Hills Autonomous District Council (JHADC) namar kan ap ïa ka jingthmu ka Sorkar India ban wanrah ïa ka jingpynkylla ïa ka Khyrnit Ba Hynriew lane ka Sixth Schedule jong ka Riti Synshar.
Katkum ki khubor ba la ïohlum, la ïathuh ba ka sorkar India mynta ka la pynkhreh shaid-shaid ban wanrah ka jingpynkylla ïa ka Sixth Schedule ha Parliament kaba lah ban long mynta u snem na ka bynta ka jingbit jingbiang ki Autonomous District Council kiba don ha ki jylla bapher bapher.
Na ka liang ka KHADC hapoh ka jingïalam u Bah Pynïaid Sing Syiem kum u CEM ruh ka la pynkhreh ban ai jingmut biang sha ka Sorkar India lyngba ka sorkar jylla ban wanrah ïa jingïaid beit ïaid ryntih ha ka synshar khadar jong ki District Council.
Ka samoi treikam jong ki MDC ha KHADC bad JHADC na ka bynta ka san snem kan kut ha u Rymphang 2024. Hynrei ka tyllong khubor ka ïathuh ba ka sorkar jylla ka lah ban ym pynbna ïa ka ilekshon namar kan ap ïa ka jingpynkylla ïa ka Khyrnit Ba Hynriew.
Shuh shuh ki khubor ki ïathuh ba ka sorkar jylla ka lah ban rah ïa ka ilekshon MDC jong kine ar tylli ki District Council shaduh u snem 2025.
Ki khubor ki ïathuh ba lada jia ba ka sorkar India ka wanrah ïa ka jingpynkylla ha ka Khyrnit Ba Hynriew kan don ka jingphiah ïa ki konstitwensi katkum ka jingbun briew, namar ha KHADC ka jingdon ki MDC na ka 30 ngut, ba kynthup ïa 29 ngut ba jied ki paidbah bad uwei ba shu thung, ka lah ban kiew sha ka 40 ngut.
Ki khubor ki ïathuh ba ki seng saiñpyrthei kiba don ha ka sorkar jylla kim pat da patiaw than ban ïakren ïa ka ilekshon MDC namar ki hap ap haduh u snem 2025.
