Shillong, Jylliew 29:
Ka “Ïarap ïa ki – ha ka khyllipmat ba ki donkam eh”, kaba dei ka kynhun ha ka WhatsApp Group ka la lah ban pynmih ïa u synñiang ban ïarap ïa artylli ki longïing kiba don hapdeng ki jingeh.
Kawei na kine ka dei ka longïing jong ka Kong Rimabila Nongbet Sohlang na ka shnong Mawrohroh, Nongspung Syiemship bad kawei ka dei jong ka Kong Linda Swer bad Bah Sdan Jaba na ka shnong Phanniewlah Rum, Lyngïong Lyngdohship.
Ïa kine ki jingïarap la lah ban ai ha ka sngi Palei sha kine ki longïing. U Sordar ka Mawrohroh, Bah Dmar Rani u la ai khublei ïa kane ka kynhun kaba la mih shakhmat ban ïarap ïa kane ka longïing ha ka por ba ki don hapdeng ki jingeh ha kaba la don ryngkat ki bahaïing bahasem bad katto katne ki nongshong shnong.
U kpa jong kane ka longïing u la khlad noh dang shen da kaba iehnoh ïa ka kurim bad hynriew ngut ki khun kiba kynthup ïa iba dang san bnai. Kane ka longïing ka la ïakynduh ïa ki jingeh ha bun ki liang bad ka ïing kaba ki shong ki sah ruh ka dei kaba khapngiah.
Katei ka kynhun ka la aiti ïa u synñiang ha ka Kong Rimabila da ka Kong Revereen Dkhar kaba na Mawngap Lumparing kaba ïadonbynta ban noh synñiang.
Ha ka jingleit aiti ïa ka jingïarap ha ka shnong Phanniewlah Rum la don ryngkat u Rangbah Shnong Bah Justin Kharbteng, ki riewrangbah, ki longkmie, ki samla kynthei bad shynrang bad ki bahaïing bahasem.
Na ka liang u Rangbah Shnong u la pynpaw ba ka long ka nuksa ba janai ïa kiwei ruh kiba don ka mynsiem sngewlem ban kner ki kti jingïarap haba ki paradoh parasnam ki donkam ïa ka jingïarap.
U la ïathuh ba na ka liang ki nongshong shnong ruh ki la lum ïa u synñiang katba mih ban ïarap ïa kane ka longïing kaba mad ïa ka jingeh na ka jingshitom jong arngut ki khun ba dang 2 snem, 2 bnai bad ka kmie ruh kam don ha ka met ba koit ba khiah naduh ba ïoh ïa i khun barit, kumjuh u kpa u don ha ka met bym da shait da khlaiñ.
U samla Saiñkupar Sunn na ka shnong Mawkalum uba dei uwei na ki dkhot kane ka kynhun u la aiti ïa u synñiang ha ka Kong Linda. Ïa kane ka kynhun ha kane ka sngi la ïalam da u Bah Staising Kharbteng uba long u nongsaiñdur ïa kane ka kynhun ha ka jingdon ryngkat ki katto katne kiba la noh ïa u synñiang.
U la pynpaw ka jingsngewnguh ïa baroh kiba la ïadon bynta ban pynmih ïa u synñiang na kylleng sawdong ka Bri u Hynñiewtrep kynthup ïa ka Khasi Students Union, Tyrsad Circle bad kiwei kiwei kaba la ïadon bynta ban noh ïa u synñiang.
