Shillong, Jylliew 29:
U rangïalehkai Muay Thai ka Jylla u Skhemborlang Marweiñ na ka shnong Nongriat un pynkhreh sa lai tylli ki jingïakhun ‘pro fights’ ban long ha Bangkok, Thailand. Kane ka dei ka lympung kaba heh ha ka pyrthei ka ban pynlong ha Lumpinee Stadium.
Ka jingïoh une rangïalehkai ïa kane ka lad ban leit sha Bangkok ka wan hadien ba u la khur ïa ka nam lahduh ha ka Pro Fight Night jong ka National Muaythai Championship kaba dang shu kut shen mynta u bnai ha Tamil Nadu.
Haba pynpaw ha ki lad pathai khubor hadien ka jingwan ai khublei ïa u MLA ka Mawkynrew, u Bah Banteidor Lyngdoh ha ka Sngi Palei, une u samla u la ong ba ka jingwan ai khublei ka long namar u Bah Banteidor u dei u briew uba ju ïarap ïa u bad kumjuh ïa ka Muay Thai Association of Meghalaya na ka por sha ka por.
U la ong ba ha ka jingleit ban ïakhun sa ïa lai tylli ki lympung kin long ha u Naitung mynta u snem. La synran lang ïa une u rangïalehkai da u Bah Pynsuklang Sume uba dei u nonghikai.
